Deklarata e deputetit gjerman Gunther Krichbaum se ishte skeptik për çeljen e negociatave për Shqipërinë shkaktoi shumë reagime në Shqipëri. Krichbaum më herët ka deklaruar se Shqipëria nuk është ende gati dhe se vendimi për të çelur negociatat është i parakohshëm.
Të shumtë ishin shqiptarët që komentuan në faqen e tij të ‘Facebook’-ut, pas deklaratës së fortë.
Mes komentuesve bie në sy postimi i Dritan Zaganit. Ish-shefi i antidrogës në Vlorë i cili ndodhet për azil në Zvicër shkruan deputetit gjerman se ka të drejtë për çfarë është shprehur.
Në koemnetin e tij, Zagani shkruan se shqiptarët po qeverisen nga politikanë të korruptuar dhe të implikuar me trafiqe droge.
“Z.Gunther Krichbaum! E vërteta dhemb por keni plotësisht të drejtë! Mendoj se politikanët europianë duhet të jenë më shumë në gjendje për të ndihmuar popullin shqiptar, që të shpëtojnë nga kjo qeverisje, nga këta politikanë të korruptuar dhe narkotikë që sot komandojnë Shqipërinë. Të jeni të sigurt se populli shqiptar ju falenderon shumë për ndihmën tuaj në procesin e demokratizimit të vendit tonë,’’ shkruan Zagani.
