Zoran Zaev, prezantoi sot në Kuvendin e Maqedonisë programin e qeverisë që pritet të kryesojë së shpejti.
Zaev paraqiti para ligjvënësve shtyllat kryesore të programit, me fokus të qartë integrimin e Maqedonisë.
Ai foli ndër të tjera për bashkëjetesë dhe rritje të mirëqenies së qytetarëve.
“Do të fokusohemi te ekonomia, institucionet e forta dhe drejtësia për të gjithë. Do të fokusohemi te NATO dhe prespektiva evropiane. Kërkoj besimin për qeverinë e re dhe për programin e ri”, tha Zaev.
“Jemi përcaktuar për të formuar një shoqëri ku të gjithë do të kenë të drejta të njëjta. BE-ja dhe NATO janë prioritetet tona strategjike. Qëllimi ynë është fillimi i bisedimeve me BE në afat sa më të shkurt dhe anëtarësimi në NATO sa më shpejt”, theksoi ai.
Në aspektin ekonomik Zaev tha se rroga minimale 12 mijë denarë do të rritet që vitin e parë në 16 mijë denarë, ndërsa rroga mesatare të shkojë në 30 mijë denarë.
Gjithashtu Zaev theksoi se do të formohet repart special në gjykatë për rastet të cilat i udhëheq Prokuroria Seciale Publike.
Ai tha se vendin e presin sfida dhe reforma serioze dhe se do të jetë kryeministër i të gjithë qytetarëve.
“Ka nevojë për përfshirje nga të gjithë. Kjo është koha e qytetarit. Të ndarë nuk mund të bëjmë asgjë, por së bashku mund të sigurojmë të ardhmen për të gjithë. Do të ketë ndryshim total në udhëheqjen e politikës në vend. Politikanët do t’i shërbejnë qytetarëve”, deklaroi mes tjerash Zaev.
