Kryeministri i Maqedonisë, Zoran Zaev është takuar me kryetarët e komunave të Strugës dhe Ohrit, Mustafa Zabzun dhe Nikolla Bakraçeski.
Në takim mori pjesë edhe ministri i Financave Dragan Tevdovski. Zaev u shpreh gjatë pritjes së Zabzun dhe Bakraçeski se dyert e Qeverisë të Republikës së Maqedonisë janë të hapura për të gjitha komunat dhe në plan të parë të Qeverisë aktuale është interesi i zgjidhjes së problemeve të qytetarëve në të gjitha komunat, pa dallim të asaj cila parti politike është në krye të vetëqeverisjes lokale.
Gjithashtu, Zaev u bëri thirrje njerëzve të parë të këtyre dy komunave që të bisedojnë dhe të gjejnë zgjidhje për problemin me të cilat ballafaqohen këto dy qytete, në interes të qytetarëve:
“Një nga problemet e përbashkëta për të cilat është biseduar në këtë takim janë problemet në punën financiare të dy njësive të vetëqeverisjes lokale të cilët ballafaqohen me bllokim kronik të llogarive në komuna, për shkak të borxheve të cilat janë krijuar prej shumë shkaqeve.
Në masë të madhe borxhet e Ohrit dhe Strugës dalin nga obligimet akumuluese për shkak të mospagesës në kohë të kredisë nga Banka Evropiane për Ripërtëritje dhe Zhvillim, të cilën në vitin 1998 e dakordoi Ministria e atëhershme e Tregtisë për ndërtim të kolektorit për filtrim në Liqenin e Ohrit, i cili pastaj pagesën e kësaj kredie ia transferoi komunave”, thuhet në njoftimin e Qeverisë.
Më tej, theksohet se kryeministri Zaev ka treguar interes për gjetjen e zgjidhjes për këto çështje të dy komunave.
Kryeministri Zaev gjatë takimit theksoi rëndësinë e menaxhimit të pastrimit të Liqenit të Ohrit, ndërsa njoftoi se do të përgatitet një plan për mbrojtje të vazhdueshme të ujërave në Liqenin e Ohrit.
