Trajneri i Partizanit të Beogradit, Mirosllav Xhukiç ka dalë para medieve për të mbajtur konferencën në prag të ndeshjes me Skënderbeun në “Elbasan Arena”. Xhukiç ka thurur elozhe për ekipin e Skënderbeut dhe e ka lavdëruar mënyrën se si i eliminuan kundërshtarët e fortë për tu kualifikuar në grupe. Edhe pse kjo sfidë do të zhvillohet në masa të rrepta sigurie, Xhukiç ka dhënë disa mesazhe paqeje që duhet të arrihen mes dy vendeve dhe se në një të ardhme do të mund ti shijojmë ndeshjet me qetësi dhe me përkrahjen e tifozëve të të dyja ekipeve.
“Ndeshje shumë e vështirë. Skënderbeu është ekip agresiv, me sulm të fortë e mbrojtje solide. Tifozeria e zjarrtë do t’i japë zemër Skënderbeut, ndaj edhe një barazim na kënaq, edhe pse natyrisht luajmë për fitore, ndaj një rivali direkt dhe shumë serioz, që ka eliminuar me meritë Dinamon e Zagrebit”.
“Nuk mendojmë për tension e probleme, është thjesht ndeshje futbolli. Sporti bashkon dhe futbolli duhet të bashkojë rajonin. Do të vijë koha kur nuk do të ketë më probleme mes nesh dhe tifozët do të udhëtojnë qetësisht për të parë ndeshjet në Shqipëri e Serbi”.
