- Pep Guardiola në një konferencë për shtyp i është përgjigjur një pyetje se kush janë skuadrat më të mira të dekadës së fundit. Zgjedhjet e trajnerit katalan kanë ngjallur shumë debat, pasi jashtë asaj liste ka lënë një nga ekipit që ka fituar gjithçka në vitet e fundit.
“Janë 3 skuadrat më të mira të dekadës së fundit: Juventus, Bayern Munchen dhe Barcelona. Pse? Sepse çdo sezon ata fitojnë kampionatin, sepse çdo sezon fitojnë Kupën dhe çdo sezon janë aty duke konkurruar. Për këtë arsye janë më të mirët”, tha Guardiola.
Trajneri i Manchester City ka lënë jashtë listës së tij Realin e Madridit, që në 5 sezonet e fundit ka fituar 4 herë Ligën e Kampioneve dhe përgjigjja e trajnerit të Realit, Santiago Solari ishte e menjëhershme.
“Nuk do të zihemi për një dekadë kur Reali është skuadra më e mirë e shekullit dhe rrjedhimisht, skuadra më e mirë e historisë. Pra, edhe e dekadës së fundit. Reali është ekipi më i mirë pasi kurrë nuk nënvlerëson kundërshtarin, kushdo qoftë ai”, tha Solari.
