Xhamia historike Et’hem Beu, e cila njihet si simbol i kryeqytetit të Tiranës, mbyll dyert ditën e premte mbrëma pasi do të rikonstruktohet.
Informacionet zyrtare thonë se rikonstruktimi do të zgjasë rreth dy vite.
Xhamia Et’hem Beu rimbyllet sërish pas 27 vitesh, që prej rihapjes së saj pas lejimit të ushtrimit të besimit mysliman nga regjimi komunist.
Ndërkohë, muaj më parë, Et’hem Beu do pësonte një mbyllje disaditore për shkak të një samiti të gjeneralëve të NATO-s që u zhvillua në Hotel Plazza, pak metra më tutje. Vendimi që erdhi nga organet e sigurisë shkaktoi reagim në radhët e bashkësisë së besimtarëve të cilët u ndjejnë si të privuar padrejtësisht nga ushtrimi i ritualeve e si të fyer nga paragjykimi.
Por tashmë, për tjetër arsye, Et’hem Beu nuk do jetë funksional. Veç funksionit bazë, atë të kryerjes së ritualeve për besimtarët muslimane, kjo xhami përbën dhe një objekt me një vizitueshmëri të lartë turistike. Për Tiranën dhe qendrën e saj, ajo mban vendin e parë të tërheqjes së masës së atyre që vizitojnë Tiranë, të huaj apo shqiptarë nga trojet e tjera.
