Muaj më parë, vetë ambasadori amerikan Donald Lu ka deklaruar se në Shqipëri veprojnë në mënyrë aktive 4 klane mafioze dhe 20 familje kriminale, ndërsa bëri apel që shteti të mobilizohet në kapjen dhe arrestimin e tyre.
Kanë kaluar muaj të tërë pas deklaratave të tilla, nuk ka asnjë familje kriminale pas hekurave, ndonëse ishte trumbetuar se muaji janar do të jetë muaji i “peshqve të mëdhenj”, por edhe kjo rezultoi të jetë thjeshtë një deklaratë politike.
Në emisionin “Studio e Hapur” në “News24”, ministri i Brendshëm Fatmir Xhafaj ka thënë se vendin tonë veprojnë më shumë se 20 grupe kriminale. Ato janë 41 të tilla. Ai shkon më tej ku thotë se nuk është lufta tek numrat apo shifrat, por kjo duhet të shoqërohet me veprime konkrete, të cilat sipas tij, janë identifikuar dhe po punohet për goditjen e tyre.
Ministri Xhafaj ka deklaruar se grupet më të rrezikshme mbretërojnë në Tiranë, Vlorë, Elbasan Shkodër, por edhe në qytete të tjera, ndërsa ai theksoi se identifikimi dhe kap[ja e tyre duhet kohë dhe hetime me mjete të strukturuara, pasi sipas tij, kjo nuk është e lehtë për t’u arritur. Në kuadër të operacionit, Xhafaj deklaroi se deri më tani është goditur një grup në Fier dhe një në Shkodër.
