https://www.facebook.com/tiranatodaycom/videos/364906477287429/
Ministri i Brendshëm, Fatmir Xhafaj ka marrë pjesë në konferencën e ministrave të Brendshëm të rajonit në Trieste të Italisë. Gjatë fjalës së tij, Xhafaj foli për sukseset e policisë, gjë që sipas tij u arrit falë bashkëpunimit mes vendeve të rajonit.
“Falë bashkëpunimit në mes vendeve tona, kemi arritur suksese në gati të gjitha drejtimet për t’i garantuar qytetarëve një siguri gjithmonë e më të madhe. Ndaj, së bashku, duhet t’i japim një impuls të ri luftës ndaj kriminalitetit dhe duhet të eksperimentojmë dhe jetësojmë modele të reja ndërveprimi midis organeve tona të policisë apo autoriteteve gjyqësore”, nënvizoi Xhafaj, para ministrave të Brendshëm të Ballkanit Perëndimor.
Kjo deklaratë për arritjen e sukseseve dhe garantimi i sigurisë së qytetarëve vjen në një kohë kur vetëm para pak ditësh u arrestua Moisi Habilaj nga drejtësia italiane, e cila disponon një dosje, përgjimet e së cilës përfshijnë edhe emrin e ish-ministrit Saimir Tahiri.
Vetëm para pak ditësh, bandat e Elbasanit u përplasen me policinë, gjë që solli shkarkimin e 11 drejtuesve në Policinë e Elbasanit.
Ndërkohë, sërish para pak kohësh në Babicë të Vlorës u sekuestruan 4 ton drogë në banesën e një prej të afërmve të Habilajt. Çuditërisht, ky sekuestrim vjen pas arrestimit të Habilajt nga drejtësia italiane, gjë që duket se ka shtyrë Policinë e Shtetit të veprojë.
Ndërkohë, Guardia di Finanza ka bërë një punë kolosale me sekuestrimin e 24 tonëve drogë vetëm në 2017-ën, të nisur nga Shqipëria drejt Italisë, lajme që shpesh janë shitur si një “arritje” e Policisë së Shtetit shqiptar.
Sot, njoftohet miratimi i propozimit të ministrit Xhafaj për ngritjen e një Qendre Rajonale të Bashkëpunimit Policor. Duket se ndërhyrja e të huajve është përherë domosdoshmëri për të garantuar disi sukses në institucionet tona.
