Xavi Hernandez në një intervistë të dhënë për El Pais, ka folur për aktualitetin e fundit të futbollit dhe ka bërë disa paralelizma e vlerësime për lojtarët e Realit dhe të Barcelonës. Po ashtu ka parashikuar se pas epokës së Ronaldos dhe Messit do të ketë një lojtarë të ri që do të dominojë futbollin në disa vite.
“Pas Messit dhe Cristianos, imagjinoj që do të jetë epoka e Neymar për 3 apo 4 vite. Pastaj do të jetë e Mbappes”, filloi Xavi.
Por këto nuk janë emrat e vetëm për të cilët foli katalanasi. Ish-kapiteni i Barcelonës veçoi edhe disa lojtarë të tjerë që sipas tij i tërheqin vëmendjen. “Vitolo dhe Saul më pëlqejnë shumë. I mendoj të dy tek Barcelona dhe them: sa mirë do ishte! Carvajal më duket një anësorë i shkëlqyer nëse nuk e pengojnë dëmtimet dhe Thiago është brutal.”
Ish-mesfushori po ashtu foli edhe për Iscon. ”Është akoma shumë i ri dhe besoj që duhet të di atë që më thoshte Luis Aragones: ‘Po ty çfarë të pëlqen? Futbolli i bukur apo futbolli i mirë?’. Dhe unë nuk e kuptoja: ”Çfarë do të thotë kjo?’. ‘Ju kërkoni futbollin e mirë. Të bukurin po, por vetëm për të mashtruar syrin‘. Nuk dua të përmend emra por në La Liga jemi impresionuar shumë nga lojtarët që kanë ikur pa mos lënë gjurmë. Po, sa bukur luanin, por për çfarë? Çfarë bukurie bën Messi? Messi nuk bën finte. Messi bën më të zakonshmen. Messi është futbolli i mirë, që ndonjëherë është aq i mirë sa që bëhet i bukur.”
Ndërsa për futbollin në përgjithësi, ish-kapiteni i Barcelonës analizoi situatën më në detaje: ”Ajo që na mungon është zhvillimi i teknikës, talentit, kjo sepse ndodhin gjëra të çuditshme, si për shembull prishja e konceptit të sulmit. Në futbollin top ka më shumë Simeone se sa Guardiola.”
Dhe pikërisht në këtë kontekst, Xavi përmendi Casemiron, të cilin e analizon në këtë mënyrë: “Në Barcelonë e kuptojmë futbollin si koordinim ndërmjet hapësirës dhe kohës. Kush dominon? Busquets, Messi, Iniesta: janë maestrot e hapësirës-kohës. Gjithmonë dinë t’i bëjnë gjërat, qoftë nëse janë të vetmuar, qoftë nëse janë të rrethuar. Dhe ka mesfushorë si Casemiro që nuk i kuptojnë këto gjëra. Por, e kundërta, Busquets nuk mund të bëje asnjëherë sakrificat që bën Casemiro kur loja është fizike dhe luhet përballë njëri-tjetrit.”
Pastaj vijoi më tej: “Real Madridi nga ana tjetër, del në sulm me 7 lojtarë dhe Casemiro qëndron i vetëm në mesfushë për t’i mbuluar. Kjo është loja ballë për ballë. Këtë Busquets nuk mund ta bëje sepse madje dhe unë jam më i shpejtë se ai. Casemiro është i shpejtë. Por, i ngadalëson të gjithë tjerët sepse nuk ka punuar në këtë aspekt: ka karakteristika tjera, është më defenziv, vjedh më shumë topa, arrin në vendin e duhur, mbulon më tepër hapësira. Por kursesi nuk dominon në lojën hapësirë-kohë.”
