Barcelona nisi tre oferta në drejtim të Chelsea për të fituar shërbimet e sulmuesit anësorë brazilian, Willian, por u refuzuan. Oferta e fundit ishte 65 milionë euro, por ‘Blutë’ e Londrës kërkonin mbi 80, kjo bëri që katalanasit të firmosnin me një brazilian tjetër Malcolm.
Braziliani duhet ti ishte bashkuar skuadrës, që tashmë drejtohet nga Sarri që të premten, por ai vazhdon pushimet me familjen e tij pas Botërorit dhe klubit i ka sqaruar se ka një problem me pasaportën. Kjo mund të jetë e vërtetë por “Daily Mail” ngre edhe pistën se ai po u jep më shumë kohë ekipeve të interesuara për të që të veprojnë.
Tani në garë duket se është futur Real Madrid, i cili ka hequr dorë nga Hazard dhe kërkon që me 113 milionë euro të rrëmbejë dy lojtarë nga Chelsea, Willian dhe Thibaut Courtois. Për portierin, vlera e ofruar nga kampionët e Evropës mendohet të jetë rreth 40 milionë euro, ndërsa ajo për sulmuesin brazilian pritet të jetë rreth 73 milionë Eurosh. Gjithnjë sipas asaj që publikohet në median britanike, Reali i Madridit ka shfaqur interesin për Willian pasi nuk e përjashton mundësinë e largimit të Gareth Bale nga skuadra.
“Daily Mail” thekson gjithashtu se kjo ofertë e Realit të Madridit është marrë në konsideratë nga drejtuesit e Chelseat të cilët e treguan gatishmërinë për të studiuar ofertat për Willian edhe më parë kur për të shfaqi interesin e saj edhe Barcelona.
