Williams zgjedh Sirotkin para Robert Kubicas

Sergey Sirotkin është zyrtarisht piloti i dytë i Williams për Botërorin e radhës në Formula 1. Skuderisë iu desh gati një muaj që të gjejë garancinë se kush do të jetë shok skuadre me Lance Stroll, i cili u rikonfirmua si pilot i parë. Në fakti, emri i 22-vjeçarit Sirotkin përflitej prej kohësh në ambientet e skuadrës britanike, por në garë ishte dhe polaku Robert Kubica, i cili synonte të rikthehej në Formula 1 pas 7 vitesh. Sidoqoftë, Williams ka vend për të dy, sepse Kubica do të jetë piloti rezervë dhe kolaudator i makinës si dhe do të merret me përmirësimin e motorit.

Sirotkin prej vitit 2016 ka qenë pilot i tretë i Renault, duke qenë edhe pjesëmarrës në disa nga sesionet e lira në edicionin e kaluar. Në fjalën e tij rusi u shpreh i lumtur për mundësinë që po i jep Williamsi dhe premtoi se do të japë maksimumin.