Mauro Icardi ka kaluar një sezon fantastik me Interin këtë sezon duke qenë kryegolashënues me 28 gola bashkë më Immobilen. Por duket se kjo nuk ka mjaftuar për të qenë pjesë e kombëtares së Argjentinës e cila e ka lënë jashtë Kupës së Botës.
Si ngushëllim për këtë mungesë, argjentinasi ka fluturuar në safarin afrikan së bashku me menaxheren-partnere të tij, Wanda Nara. Në safari nuk ishin të vetëm. Atje janë kafshët tipike të botës së egër afrikane, mes të cilave edhe zebra, simbol dhe maskoti i skuadrës së Juventusit, rivalit të përjetshëm dhe më të urryer nga tifozët interistë.
Wanda Nara pikërisht nga zebra u magjeps dhe postoi në Instagram një filmim të shkurtër me kafshën vija-vija bardhezi. Vijat dhe kafsha vetë nuk ka shqetësuar tifozët zikaltër, që e ndjekin atë në rrjetet sociale, por ngjyrat bardhezi vështirë se i pranojnë, sidomos në këtë periudhë kur po flitet gjithnjë e më shumë për një kalim të Mauro Icardit tek Juventusi.
Dilema e madhe që po qarkullon në rrjet është: a ishte një sinjal i Wanda Naras për një kalim të bujshëm në aksin Milano-Torino, apo thjesht zebra rastisi në vendin e gabuar dhe kohën e gabuar? Pikërisht kjo e fundit, pra koha, do ta zbardhë këtë.
