Zhvillimet politike në Kosovë nuk i jepin garanci diplomatit amerikan William Walker. Ai thekson se nuk është bërë sa duhet nga klasa politike kosovare përgjatë këtyre viteve. Partitë aktuale në Kosovë nuk kanë një vizion të qartë, ndersa për diplomatin amerikan, alternativa e gjeneratës së re në politikën kosovare duhet të jetë “Vetëvendosja” e Albin Kurtit.
Sipas Walkerit, kur kanë kaluar 19 vite nga fundi i luftës në Kosovë, gjërat nuk po ecin, ndërsa nënvizoi se tashmë është koha për një gjeneratë të re politike.
“Aktualisht klasa politike që udhëheq vendin ka dalë nga lufta, përderisa tani është koha që ky shtet të ketë një gjeneratë të re të udhëheqësve politik. Të gjithë theksojnë se dëshirojnë ndryshimin, por unë ndryshimin nuk po e shoh”- deklaroi Walker në një intervistë në “Info Magazine” në Klan Kosova.
Diplomati amerikan dhe miku i madh i shqiptarëve duke sjellë eksperiencat personale shtoi se udhëheqja politike e dalë nga lufta, nuk ka praktikisht një mandat të gjatë.
