Pak kohë më parë, moderatori Alban Musa u largua nga emisioni “Rreze Dielli”. Me anë të një postimi në rrjetet sociale, ai sqaronte se shkak për këtë vendim ishte bërë një konflikt me drejtuesit. Nga ana tjetër, përgjegjësit e televizionit “Report Tv” dhanë një version tjetër.
Sipas tyre, Alban Musa ka shkelur masat higjienike të vendosura nga televizoni, si pasojë e COVID-19, duke u shprehur se ka vendosur në rrezik jetën e të gjithë stafit. Por moderatori vjen sërish pranë publikut me një format tjetër në “Abc News”, dhe programi i tij do të quhet “Nëpër Shqipëri”.
I ftuar sot në emisionin “ABC-ja e mëngjesit” me gazetarin Enkel Demi, autori i programit tregoi disa prej destinacioneve dhe sipërmarrjeve që do të jenë pjesë e puntatave të para.
Ai shtoi se ky program ka si qëllim të sjellë Shqipërinë e vërtetë, me destinacionet e saja fantastike dhe sipërmarresit e shqiptarët punetorë.
“Nëpër Shqipëri” puntatën e parë ia ka dedikuar zonës së Tamarës në Kelmend dhe historisë së një sipërmarrësi të zonës, mes sukseseve dhe veshtirësive që ai has për të ecur përpara. “Nëpër Shqipëri” do të transmetohet çdo të shtunë në orën 17:00, në ekranin e “Abc News”.
