Presidenti i Serbisë, Aleksandër Vuçiç premtoi të udhëheqë Ballkanin drejt Bashkimit Evropian dhe fakti që Rusia po armatos ushtrinë serbe nuk e cenon këtë qëllim. Presidenti Aleksandër Vuçiç tha për “Associated Press” se do të kërkojë anëtarësimin në BE, ndërkohë që nuk i shkëput lidhjet me aleatin tradicional sllav, Rusinë dhe fuqitë e tjera botërore.
“Ne e dimë se ku po shkojmë, rruga drejt BE-së është qëllimi strategjik i vendit tonë”, tha ai, me flamuj të BE dhe të Serbisë në sfond. “Në të njëjtën kohë, ne duam të ruajmë marrëdhënie të mira me Rusinë, Turqinë, Kinën, SHBA-në dhe gjithë të tjerët”.
Ndërsa kërkon anëtarësimin në BE, Serbia po afrohet më shumë me Rusinë e cila është duke e furnizuar me avionë luftarakë MiG-29 dhe po planifikon t’i japë tanke beteje dhe automjete të blinduara, në kuadër të rritjes së ndikimit të Moskës në Ballkani.
Zyrtarët perëndimorë janë shqetësuar lidhur me armatosjen e Serbisë dhe i kanë bërë thirrje Beogradit të vendosë se ku do të shkojë, në Lindje apo Perëndim.
“Unë nuk shoh asgjë të keqe këtu, kjo është politika jonë dhe ne jemi ushtarakisht neutralë”, tha Vuçiç duke deklaruar se armatosja e Serbisë nuk është kërcënim për fqinjët.
“Ne kujdesemi për sigurinë tonë, kemi blerë dy helikopterë nga Rusia, nëntë helikopterë nga gjermanët dhe francezët, kemi blerë interceptorët rusë (MiG), do të blejmë edhe gjëra të tjera. Ne do të bëjmë më të mirën për vendin tonë,” tha Vuçiç.
Vuçiç pranoi se e kaluara nacionaliste si anëtar i lartë i partisë që luftoi për zgjerimin e kufijve serbë në Ballkan ka sjellë dyshime rreth sinqeritetit të reformave të tij pro-perëndimore.
“Djali që luftonte kundër BE-së 20 vjet më parë, ish-anëtar i Partisë Radikale … e di që për shumë njerëz nuk është e lehtë ta gëlltisin,” tha Vuçiç.
Vuçiç shmangu faktin se disa anëtarë të qeverisë serbe dhe disa nga bashkëpunëtorët e tij të ngushtë janë të pro-rusisë dhe anti-perëndimorë pavarësisht nga drejtimi që ka deklaruar shteti.
“Unë mendoj se çdo anëtar i qeverisë jep më të mirën e tij për të përmbushur qëllimet e shtetit dhe një nga qëllimet kryesore është anëtarësimi ynë në BE,” shtoi ai. “Unë mendoj se duhet të jemi pjesë e Bashkimit Evropian. Kjo është detyra ime, puna ime dhe unë do ta bë”.
Vuçiç tha se pengesa më e madhe e Serbisë në rrugën drejt BE është gjetja e një zgjidhjeje për Kosovën, krahinën e mëparshme serbe me etni shqiptare, e cila shpalli pavarësinë në vitin 2008, pavarësi që Serbia nuk e njeh. BE po ndërmjetëson bisedimet mbi normalizimin e marrëdhënieve midis Beogradit dhe Prishtinës dhe Evropa beson se Serbia duhet të pranojë shtetësinë e Kosovës përpara se të bashkohet me BE-në.
Vuçiç ka iniciuar një diskutim të brendshëm në Serbi për Kosovën me qëllim përgatitjen e publikut për një marrëveshje që mund të zgjidhë problemet etnike që shkaktuan luftën e 1998-99, e cila u ndal me bombardimet e NATO-s. Shumë serbë e konsiderojnë Kosovën pjesë të Serbisë dhe nuk do të pajtoheshin kurrë me njohjen e saj.
“Ky konflikt ka qenë i ngrirë për shumë vite, a është mirë të vazhdojë kështu edhe në 50 apo 100 vitet e ardhshme? Unë mendoj se jo, kjo ishte dhe arsyeja kryesore për fillimin e këtij diskutimi të brendshëm,” tha Vuçiç.
“Kemi nevojë për një marrëveshje paqësore afatgjatë me shqiptarët në 200 vitet e ardhshme,” tha ai, duke shtuar se të gjitha palët ‘do të duhet të bëjnë disa kompromise’.
Kritikët e Vuçiçit e kanë akuzuar për sundim autokratik, për shtypjen e medias përmes kërcënimeve dhe presionit financiar. Ata thonë se Perëndimi i ka mbyllur sytë ndaj politikave të tij jodemokratike për aq kohë sa ai e mban Ballkanin në paqe.
Vuçiç mohoi këto akuza duke argumentuar se Serbia ka ndryshuar ligjet e medias në përputhje me standardet e BE.
Ai tha se Serbia ka nuk ka zëra unanim në media, dhe se ndihet krenar për këtë.
“Ndryshe nga shumë vende të Evropës Perëndimore ne nuk kemi kufizime në asnjë prej rrjeteve sociale,” tha Vuçiç. “78 – 79 për qind e popullatës sonë përdor rrjetet sociale, njerëzit kanë telefonat e tyre dhe informohen nëpër telefonat e tyre”. TIRANA TODAY
