Presidenti serb Aleksandër Vuçiç i është përgjigjur ashpër ambasadorit amerikan në Serbi, Kyle Scott. Ky i fundit deklaroi se Kosova është shtet i pavarur dhe sovran. Ndërkohë, sot Vuçiç tha se Scott duhet të tregojë më shumë respekt për shtetit mikpritës.
“Do të ishte mirë nëse ai tregon një respekt pak më shumë për vendin pritës”. Presidenti serb shtoi se përfaqësuesi i qeverisë, i cili mori pjesë në këtë ngjarje në të cilën Scott dha këtë deklaratë, duhet të përgjigjet.
Vuçiç ka deklaruar se është e drejta e serbëve të mbrojnë qëndrimet e tyre, qoftë edhe para fuqive të mëdha.
“Është e drejta e tyre, janë fuqi e madhe, por edhe e drejta jonë është që para të gjithëve edhe fuqive të mëdha, t’i mbrojmë qëndrimet tona”, ka deklaruar ai.
