Presidenti serb Aleksandër Vuçiç ka demantuar se presidenti i Kosovës Hashim Thaçi, nuk ka thënë të vërtetën lidhur me hyrjen e Marko Gjuriç në Mitrovicë .
“Marko nuk ka hyrë nëpër rrugët e dhisë. Ne do të presim edhe një kohë që ata të hamendësojnë se si dhe ku hyri ai, pastaj do t’i njoftojmë zyrtarisht ku hyri ai. Dhe, nuk ka hyrë një ditë më parë siç po flasin ata dhe në asnjë rrugë ku kalojnë vetëm dhitë, kjo është një gënjeshtër e kulluar”, tha Vuçiç në një takim në kuadër të dialogut të brendshëm.
Ai gjithashtu komentoi se njerëzve u ishte dhënë një urdhër i rreptë që të mos shkrepnin ndonjë plumb dhe të mos i përgjigjen dhunës me dhunë.
“Askush nuk donte gjakderdhje nga pala serbe, këtë e donte dikush tjetër”, tha Vuçiç.
Presidenti i Kosovës, Hashim Thaçi, në një konferencë për shtyp të shtunën, tha se Gjuriç kishte hyrë në Kosovë të dielën, një ditë para takimit në veri të Mitrovicës dhe se e kishte kaluar natën në banesën e Milan Radojçiçit në veri të Mitrovicës.
