I akuzuari kryesor për vrasjen e Behar Sofisë pranë “Piramidës”, Ernejt Shyti, doli dje para gjykatës.
23 vjeçari Shyti, i arrestuar dy ditë më parë, u shfaq me kokën ulur dhe i heshtur. Ndërkohë mësohet se për të dhe tre të arrestuarit e tjerë organi i akuzës ka kërkuar masën e sigurisë ‘Arrest me burg’.
Sipas hetimeve të deritanishme, 66 vjeçari Sofia konsiderohej nga Policia e Shtetit si “baron i drogës” ndaj dhe hetimet janë fokusuar në pistën e konflikteve të hershme për trafikun e heroinës nga Turqia në drejtim të Shqipërisë dhe më pas në vendet e BE.
Mësohet se prokuroria disponon dhjetëra pamje filmike të kamerave të sigurisë ku shfaqen personat e dyshuar duke kontaktuar me njeri-tjetrin dhe duke bërë plane për ekzekutimin e Behar Sofisë.
Sipas hetimeve, ka pamje filmike të Skënder Vathit, ka lëvizje të automjetit të tij që është vëzhguar pas ngjarjes nga policia, ka deklarime nga vëllai binjak i Ernejt Shytit, të nënës së tij dhe deklarime të një pjesëtari të komunitetit rom, i cili është shoqëruar si i dyshuar dhe liruar më pas, i cili ka dhënë detaje rreth identitetit të autorit.
Gjithashtu, burime hetimore bëjnë të ditur për “Tirana Today” se ka qeliza telefonike që provojnë faktin që personat e arrestuar janë takuar gjatë një muaj para se të kryhej vrasja, në disa vende të ndryshme.
Po kështu ka pamje filmike të lëvizjeve të Xhuliano Vishës dhe Ernejt Shytit nga Tirana në drejtim të Krrabës dhe ndërkohë ka dhe lëvizje të tyre me autobusë të linjës. Janë të gjitha provat që në harmoni me njëra-tjetrën pohojnë faktin se Ernejt Shyti është autori i ngjarjes, por dhe ai vetë e ka pranuar.
Gjithashtu, grupi hetimor mësohet se ka prova të mjaftueshme se ky grup i strukturuar kriminal, nën organizimin e Skënder Vathit dhe bashkëpunim të Xhuliano Vishës, ka rekrutuar Ernejt Shytin por dhe të Leonard Xhixhës për të ekzekutuar Behar Sofinë.
