Lëndët narkotike dhe çrregullimet mendore pas dënimit me burg për rrahjen e të atit, dyshohet të jenë arsyet kryesore që kanë çuar në vëllavrasje në fshatin Allabegi të Maqellarës, në Dibër.
Ngjarja e rëndë që ndodhi mesnatën e së mërkurës në rrethin e Dibrës, ku vëllai goditi me thikë vëllain e tij duke i shkaktuar vdekjen, vazhdon të jetë në qëndër të debatit jo vetëm në zonën ku ndodhi, por edhe për mbarë opinionin.
Sipas policisë, 23-vjeçari i goditur nga i vëllai ndërroi jetën pak minuta pasi mbërriti në Spitalin Rajonal të Dibrës, ndërkohë që autori mori fillimisht arratinë. Zyrtarë të Komisariatit të Policisë kanë sqaruar për mediat se rreth mesnatës së të mërkurës, në sallën operative ka mbërritur një telefonatë nga babai i autorit, duke kërkuar ndihmë për dërgimin e Benard Tonuzit në spital.
Kanë qenë efektivët e policisë që kanë mundësuar dërgimin e 23-vjeçarit në Spitalin e Peshkopisë. Mësohet se mjekët kanë bërë gjithçka për ta mbajtur në jetë të plagosurin rëndë, por mjeti prerës i kishte shkaktuar dëme serioze në organe jetësore Benard Tonuzit. Madje ai kishte humbur shumë gjak nga momenti kur u sulmua nga vëllai deri kur u dërgua në spital.
Efektivë të tjerë të Policisë Dibër u vunë në kërkim të autorit, Florian Tonuzi, por arrestimi i tij u bë i mundur vetëm sot, në mesditën e së enjtes, teksa ai iu afrua shtëpisë së tij në orën që po varrosej i vëllai që ai e goditi për vdekje. Mësohet se ai është diktuar nga fëmijët e lagjes së tij, të cilët kanë lajmëruar policisë, që e ka arrestuar më pas Florianin në një banesë të braktisur në fshatin Kurbeg të Maqellarës.
Ngjarja
Nga hetimet e para të ngjarjes mësohet se Benardi, në minutat e para sapo kishte hyrë e enjtja, ka dalë nga shtëpia dhe ka vajtur në lokalin e fshatit, aty ku qëndronte vazhdimisht Floriani dhe i ka kërkuar të kthehej në shtëpi. Ai ka kundërshtuar vëllain e madh, por pas këmbënguljes së tij është bindur të dalë nga lokali. Është futur në makinë dhe me sa duket kanë debatuar mes tyre nga lokali deri në oborrin e banesës së tyre. “Në momentin kur Benardi ka zbritur nga makina është goditur disa herë më thikë nga Florian Tonuzi. Ka rënë përtokë pa ndjenja. Babai i tyre sapo ka dëgjuar sherrin dhe britmat ka dalë nga shtëpia, por nuk ka pasur mundësi ta ndalë gjëmën. Floriani është larguar shumë shpejt nga vendi i ngjarjes, ndërsa babai është përpjekur t’i vijë në ndihmë djalit të plagosur rëndë me thikë. Fillimisht, ka lajmëruar Policinë dhe ka kërkuar ndihmë për dërgimin e Benardit në spital”, janë pohimet e familjarëve për oficerët e Policisë Gjyqësore.
Autori
Autori, Florian Tonuzi, dyshohet se vuan nga probleme të shëndetit mendor, fakt që konfirmohet dhe nga fqinjët. Para një viti, 26-vjecari kishte rrahur të atin, ngjarje për të cilën ka vuajtur dënimin me 6 muaj burg. Fqinjët tregojnë se gjendja shëndetësore e Florian Tonuzit u përkeqësua pasi doli nga burgu, por ai nuk krijonte konflikte me banorët e tjerë të fshatit, ndërsa me familjarët kishte sherre të herëpashershme. Sakaq, ka dyshime se autori i krimit në familje ishte përdorues i lëndëve narkotike. Ai qëndronte deri pas mesnate në lokal, me bashkëmoshatarët e tij dhe atje konsumonin kryesisht kanabis sativa.
Autori, përdorues i lëndëve narkotike
Banorët e zonës vendosën të mos i dërgonin jde fëmijët në shkollë nga frika prej rrezikshmërisë së Florianit, ndërkohë që ky institucion arsimor dje ka qenë i mbyllur. Sipas dëshmisë së një prej banorëve të zonës, të siguruar nga “Neës 24”, autori është person me probleme të shëndetit mendor dhe përdorues i lëndëve narkotike. “I morëm fëmijët nga shkolla, deri sa të kapet ai. I rrezikshëm?! Ai është i luajtur mendsh. Ka qenë që herët përdorues i lëndëve narkotike, prej shumë vitesh. Fëmijët nuk i çojmë në shkollë deri sa ta kapë Policia”, tha një prej banorëve të zonës përpara se autori të prangosej.
Sipas dëshmive të fqinjëve, familja e dy vëllezërve ishte e qetë dhe nuk ishte shfaqur asnjëherë probleme. Fqinjët kanë treguar se autori, 26-vjeçari Florian Tonuzi, kishte vetëm pak muaj që kishte dalë nga burgu (3-4 muaj), ndërkohë që dyshohet se ishte përdorues i lëndëve narkotike. Sipas fqinjëve, familja kishte vetëm këta dy djem, ndërsa autori pas daljes nga burgu kishte shfaqur probleme me shëndetin mendor. Mësohet se vëllai ka goditur disa herë me thikë të riun, ndërkohë që ky i fundit ka ndërruar jetë në Spitalin e Dibrës. “Janë familje e mirë. Në hallet dhe punët e veta. Shihnin hallet e veta. I vogli iu shtrua punës. Nuk kanë pasur konflikte, ne nuk dimë gjë. Me aq as kemi parë, sjellja ka qenë e mirë. Vetëm këta dy djem kanë familja. Ishin të pamartuar. E morëm vesh ngjarjen kur u zgjuam në mëngjes, s’dimë gjë gjëra të tjera”, tha një prej fqinjëve.
