Gjykata e Lezhës ka dënuar me 8 vite burg, 17-vjeçarin Florian Përvathi, i cili në muajin janar të këtij viti vrau për gjakmarrje bashkëfshatarin e tij, Lek Lekgjonaj. I riu u shpall fajtor për veprat penale “Vrasje për gjakmarrje” dhe “Mbajtja pa leje e armëve dhe municioneve luftarake”.
Gjykata e dënoi me 12 vite burg Florian Përvathin, por për shkak të gjykimit të shkurtuar ai do të vuajë 8 vite burgim pasi i ulet 1/3 e dënimit. Ngjarja e rëndë ka ndodhur më 24 janar 2022, në Manati të Lezhës.
I mituri e priti 65-vjeçarin Lek Lekëgjonaj te dera e shtëpisë për disa orë, dhe menjëherë u shfaq pasi Lekgjonaj doli nga makina dhe po futej në banesë duke lëshuar në drejtim të tij 2 plumba, të cilët rezultuan fatal.
I vetëdijshëm për krimin e kryer, 17-vjeçari u dorëzua në polici duke thënë se kishte marrë gjakun e babait. Në 2009, babai i Florianit, Gjon Përvathi ishte vrarë nga vëllai i Lek Lekgjonajt, Ndue Lekgjonaj.
Florian Përvathi ishte tepër i vogël kur humbi babain dhe nënën, duke u rritur me synimin e vetëm, atë të hakmarrjes ndaj fisit Lekgjonaj, gjë që çoi në krimin e 24 janarit.
