Pasi dosja u kthye në rigjykim, Gjykata Themelore në Pejë ka dënuar me burgim të përjetshëm Naser Pajazitin, i cili akuzohet se më 9 nëntor 2015, në bjeshkët e Strellcit të Komunës së Deçanit, ka vrarë në mënyrë mizore kushërirën e tij, Donjeta Pajazitaj.
Nëna e viktimës shprehet se tani ndjehet më e lehtësuar.
“Rasti është i rëndë. Por pas këtij vendimi të gjykatës ndjehemi më të lehtësuar. Gjykata mori një vendim të drejtë dhe ai është dënuar siç e ka merituar”, shprehet nëna e Donjeta Pajazitit.
Gjithashtu, edhe vëllai i Donjetës, Shkëlqimi, thotë se vendimi i gjykatës ishte i drejtë, pasi është dënaur një person që ka kryer një vepër.
Sipas tij, ky vendim është dashur të merret më herët.
“Unë po ndjehem shumë mirë sepse u dënua një persona që e ka krye një vepër. Kur gjykata ka shpallë vendimin e parë, kemi pasur vuajtje të mëdha. Tash pak a shumë na është lehtësuar vuajtja pas këtij vendimi të ri”, deklaroi Shkëlqim Pajazitaj.
Pajazitaj ishte liruar nga akuza për këtë vrasje, por Gjykata Themelore, më pas e ka kthyer lëndën në rigjykim.
Prokuroria Themelore në Pejë ka kërkuar nga Gjykata Themelore në Pejë, që ta dënojë me burgim maksimal të pandehurin Naser Pajazitaj, i cili akuzohet për vrasjen e kushërirës së tij, Donjeta Pajazitaj.
