Autori i vrasjes së gjyqtares dhe ish-gruas së tij Fildes Hazifi, mësohet se ka ankimuar në Apelin e Krimeve të Rënda një vendim të ndërmjetëm të trupës që po e gjykon në Shkallën e Parë. Shtetasi Fadil Kasemi, i cili vrau ish-gruan në 31 gusht 2017, përmes ankimit kundërshton vendimmarrjen e datës 13 korrik 2018, që rrëzoi pretendimin e tij për humbje të fuqisë të masës “arrest në burg” dhe urdhërimin e lirimit.
Me anë të avokatit, ai pretendon se pas kalimit të dosjes së tij për kompetencë nga Gjykata e Tiranës tek Krimet e Rënda, kjo gjykatë duhet të rivlerësonte masën e sigurisë.
Ndaj, në kushtet kur nuk është bërë rivlerësim, masa ka rënë.
Kasemi po gjykohet në një proces të zakonshëm tek Krimet e Rënda. Ai nuk mundi të fitojë as gjykim të shkurtuar, pasi ndryshimet ligjore të fundit, përjashtuan të akuzuarit për krime në familje nga kjo e drejtë.
