Zbulohen detaje nga ngjarja e rëndë e ndodhur në Durrës, ku e moshuara Floresha Shkurti, 83 vjeçe u vra dje në banese nga nipi saj 21 vjeçar, Redmon Gruda, i cili u arrestua sot nga policia.
Viktima kishte dëmtime në kokë dhe ishte e mbuluar në gjak. Gruaja banonte në katin e tretë të një pallati, që ndodhet te Lagjja Nr.16, pranë shkollës 9-vjeçare “Qemal Mici”, në zonën e stadiumit “Niko Dovana”.
Ka qenë nipi i saj, Redi Shkurti, me të cilin ndante banesën që ka lajmëruar Policinë, duke deklaruar se e kishte gjetur të pajetë gjyshen të shtrirë në dyshemenë e shtëpisë.
Menjëherë në vendin e ngjarjes shkuan forca të shumta policie, ekspertë kriminologë dhe mjeko-ligjorë që nisën hetimet për zbardhjen e motivit të vdekjes së 83-vjeçares. Nga këqyrja e kufomës janë konstatuar shenja goditjeje në kokë.
Ndërkohë, ekspertiza mjeko-ligjore ka dalë në përfundimin se e moshuara ka gjetur vdekjen si pasojë e goditjes me send të fortë në pjesën e kokës. Sipas ekspertëve, 83-vjeçarja gjithashtu ka dëmtime dhe në pjesët e gjymtyrëve.
Pak pas ngjarjes Policia ka bërë shoqërimin e nipit të së moshuarës si dhe bashkëshorten e djalit të saj, ndërkohë që sot vuri në pranga nipin si autor.
Ka qenë vetë nipi që lajmëroi Policinë, pasi sipas tij është personi i parë që e ka gjetur pa jetë gjyshen e tij. Sipas burimeve, e moshuara jetonte me nusen e djalit dhe nipin, pasi i biri i saj kishte ndërruar jetë pak vite më parë.
Ndërkohë që një ditë më parë ai tha se e donte shumë dhe nuk kishte asnjë arsye ta vriste, sot policia bën me dije se ka treguar se ai e ka vrarë, pasi ajo nuk i ka dhënë para.
Mësohet se djali është përdorues hashashi dhe ka kërkuar lekë te gjyshja. Ajo nuk i ka dhënë dhe ai e ka masakruar, duke e lënë të vdekur në vend.
