Ngjarja në Vlorë, ku një i ri vrau vjehrrën dhe bashkëshortin e dashnores tronditi mbarë opinionin publik. Edhe më tronditës është fakti se Hysnie Hoxhallari ka fshehur krimin e dashnorit të saj, Kasëm Pirjasi, dhe se ajo rezulton të jetë kushërira e bashkëshortes së këtij të fundit.
Por, a e ka falur gruaja Kasëmin, i cili e tradhtoi me kushërirën e saj?
Gjatë seancës gjyqësore të zhvilluar në Gjykatën e Vlorës, bashkëshortja e Kasëmit ka dhënë një shenjë faljeje, teksa ka dërguar në seancë motrën e saj, në shenjë mbështetje.
Nga ana tjetër, Hysnia në shenjë zie ishte e veshur e gjitha me të zeza, teksa doli para trupit gjykues. Ata u akuzuan për veprat penale “Bashkëpunim në vrasje” dhe “Moskallëzim krimi”.
Ndërkaq, në lidhje me fëmijën e mitur të Hoxhallarit, sipas avokatit të saj, mund të kërkohet kujdestaria e fëmijës nga familjarët e Hysnies. Por kjo, sipas tij, mbetet për t’u parë në vijim, edhe si do të shkojnë hetimet dhe çfarë dënimi do të marrë 32-vjeçarja.
“Jemi në hapat e para të gjykimit, por fëmija aktualisht është nën kujdesin e të afërmve”, u shpreh avokati. Mësohet se Kasëm Pirjasi rrezikon nga 20 vjet deri në burgim të përjetshëm.
Ndonëse askush nuk u paraqit nga familjarët e Hysnie Hoxhallarit në seancën e djeshme, dikush prej tyre ishte kujdesur për t’i gjetur asaj një avokat.
Sokol Zotaj, mbrojtësi ligjor i 32- vjeçares u shpreh dje se Prokuroria nuk ka prova të mjaftueshme për implikimin e saj në vrasje, raporton Panorama.
“Gruaja ka qenë në banesën ngjitur, me atë ku ndodhi krimi, dhe menjëherë pasi ka kryer atë, Kasëmi ka shkuar dhe i ka thënë se e mbylli, pra, e përfundoi për shkak të xhelozisë se nuk mund ta takonte dot Hysnien për shkak se burri ishte kthyer nga Greqia. Nuk e kallëzoi krimin, sepse ajo pretendon se ndihej e kërcënuar, pasi Kasëmi i tha se nëse do të tregonte, do ta vriste atë dhe djalin. Por, dhe për shkak se jetojmë në Shqipëri dhe një lidhje jashtëmartesore paragjykohet nga opinioni publik. Sipas asaj që thuhet dhe dyshohet, është një lidhje disavjeçare, tre vjet mes tyre”, deklaroi avokati.
Sipas tij, ajo në Gjykatë i është përmbajtur asaj çka ka deklaruar në Polici.
Kasëm Pirjasin dhe Hysnie Hoxhallarin akuzohen për vrasjen dhe më pas djegien më 21 janar të këtij viti të Selkie dhe Olsi Hoxhallarit, nënë e bir.
