Stephen Paddock është autori i masakrës në Las Vegas, ku u vranë 59 persona dhe u plagosën rreth 520 të tjerë.
64-vjeçari hapi zjarr në koncertin e muzikës “country” nga kati i 32-të i një ndërtese.
Paddock ishte banor i zonës dhe nuk kishte dënime të mëparshme penale në shtetin e Nevadës.
Ai jetonte vetëm 90 minuta jashtë Las Vegasit në qytetin Messquite, ku bleu një shtëpi për vetëm 369 mijë dollarë në vitin 2015, sipas të dhënave publike.
Agresori jetonte me të dashurën e tij 62-vjeçare Marilou Danley, e cila po kërkohet nga policia për ta marrë në pyetje pas nisjes së hetimeve për krimin e tmerrshëm.
Sipas policisë, Paddock kishte licenca gjahu dhe peshkimi, gjithashtu posedonte edhe atë të pilotimit.
Kontabilisti i dalë në pension kishte punuar si auditor i brendshëm në Lockheed Martin për tre vite në fund të viteve 1980 dhe kishte menaxhuar më parë komplekset e apartamenteve në Mesquite, Teksas dhe Kaliforni.
I ati i tij, Benjamin Hoskins Paddock, grabitës serial bankash, përfundoi në listën e personave më të kërkuar të FBI-së në vitin 1969, kur ai u arratis nga burgu i Teksasit teksa vuante një dënim 20-vjeçar.
Sulmi në Las Vegas konsiderohet vrasja më e madhe në historinë e SHBA-ve.
Shtetet e Bashkuara të Amerikës po vuajnë vrasjen masive më të madhe në histori pasi të paktën 50 vetë u vranë dhe më shumë se 406 u plagosën në një koncert të muzikës country në Las Vegas të dielën në mbrëmje.
Pas masakrës, ka dëshmuar edhe vëllai i agresorit, Eric Paddock, i cili është i shtangur nga ajo që ka bërë i vëllai.
Në një prononcim në CBS News, Eric tha se vëllai i tij Stephen nuk ishte një koleksionues armësh dhe ai nuk ka asnjë ide se nga i ka marrë ai armët automatike.
“Ne nuk kemi asnjë ide. Diçka e çuditshme duhet t’i ketë ndodhur. Ngushëllimet tona shkojnë tek viktimat dhe të gjitha familjet e tyre”, është shprehur Eric.
Ai e përshkroi vëllanë e tij si një njeri normal që jetonte në Nevada, duke ngrënë ‘burrito’ e duke lozur bixhoz.
