Një debat për territorin ku mblidhnin kanaçe, dyshohet të jetë bërë shkak për vdekjen e një 56-vjeçari në Korcë. Shtetasi Novruz Fiqi, është gjetur i vdekur në banesën e tij në qytetin e Korçës, ndërkohë në trupin e tij kishte shenja dhune dhe hematoma në fytyrë.
Paraprakisht, nga burime ende jo zyrtare dyshohet se shkak për sherrin që përfundoi në mënyrë tragjike, mund te jetë bërë një debat për territorin ku viktima dhe autori mblidhin kanaçe dhe materiale të tjera të riciklueshme.
I vëllai me të cilin jeton në një shtëpi në lagjen 8, ka rrëfyer se ditën e djeshme, ai ishte dhunuar brutalisht nga një person i identifikuar si Emiljano Nafizi, tashmë i ndaluar nga policia e Korçës, e cila po e heton ngjarjen si vrasje.
E gjithë familja Fiqi thotë se e nxjerr bukën duke mbledhur kanaçe, dhe materiale të tjera të riciklueshme, dhe ky dyshohet të jetë edhe shkaku për konfliktin.
Vëllai i 56-vjeçarit tregon se ai kishte plagë të rënda. “Vëllai ka qenë i dehur. Pashë qe erdhi Emiljanoja dhe po zihej me vëllanë. Vëllai im nuk ishte njeri që bën sherre. E goditi me grushta dhe shkelma. E tërhoqi zvarrë nëpër shkallë, dhe u largua me vrap. Vëllanë e gjeta të shtrirë jashtë pallatit, dhe me tha që jam mirë. Në mëngjes u ktheva ta shikoja, dhe e pashë të pajetë. Lajmërova policinë”, raporton “Ora News”.
Viktima do ti nënshtrohet autopsisë, nga një grup mjekësh ligjorë nga Tirana.
