Gjykata e Krujës liroi sot Genc Tafilin. Lirimi i tij bëri bujë për shkak të rrethanave, teksa Tafili përfitoi lirim me kusht pasi kreu 17 vite burg, nga 25 që ishte dënuar.
Genc Tafili vuante dënimin për shkak se akuzohej, bashkë me vëllanë e tij Admirin, për vrasjen e komisarit të policisë Arben Zylyftari, në vitin 2000.
Por, cila është historia e familjes Tafili, e cila prej vitesh jetoi mes vrasjeve, hakmarrjes dhe arratisë?
Bahri Tafili, i ati i Gencit dhe Admirit, ishte shpallur në kërkim, pasi dyshohej se kishte vrarë Gëzim Gecin, pas një konflikti për çështje pronësie.
Historia nis pikërisht më 2 gusht të vitit 2000, teksa Shefi i Krimeve në Policinë e Shkodrës, Prelë Pjetrushi së bashku me disa efektivë të tjerë po kryenin një kontroll rutinë, kur vunë re se Bahri Tafili u largua me vrap dhe u mbyll në banesë në mënyrë që t’i shpëtonte kontrollit.
Petrushi dhe efektivët ndërmorën tentativën për ta arrestuar, por u përballën me breshëri plumbash. Ishin vetë Bahri Tafili dhe djali i tij Genci ata që qëlluan drejt forcave të policisë, duke i detyruar këta të fundit të kërkojnë përforcime.
Në kushte të tilla, në krye të Forcave të Ndërhyrjes së Shpejtë vihet Drejtori i Policisë së Shkodrës, Arben Zylyftari. Ky i fundit qëllohet në gjoks pas disa minutash shkëmbim zjarri, ndërsa ndërroi jetë pas disa orësh në spitalin e Shkodrës.
Efektivët e policisë ekzekutojnë të dyshuarin Bahri Tafili dhe arrestojnë të birin Gencin. Ai u dënua me 25 vjet burgim, por lirohet pas 17 vitesh nga Gjykata e Krujës, e cila i heq tetë vitet e burgut që i kishin mbetur.
Djali tjetër i Bahriut, Admiri u betua se do të hakmerrej ndaj atyre që i vranë babanë, duke shënjestruar kështu Prelë Pjetrushin. Teksa Genci ndodhej në qeli, Admiri nis të hakmerret dhe i bën atentat Pjetrushit, teksa ky i fundit ndodhej me shërbim në komisariatin e Malësisë së Madhe.
Pjetrushi mbeti i plagosur rëndë, ndërsa Admir Tafili u arrestua pas disa muajsh nga policia. Ndërkohë, oficeri i lartë i policisë Prelë Pjetrushi u largua në SHBA për arsye sigurie, por la pas familjen në Shkodër.
Një leje e dhënë nga nëpunësit e burgut të Shën Kollit për Admir Tafilin bëhet shkas për dy vrasje të tjera. Admiri mori leje 5-ditore më 2 tetor të vitit 2010 për të takuar familjarët, por kjo leje ishte një justifikim për t’u arratisur. Ai arrin arrin të largohet në sy të gardianëve, të cilët e ruanin para shtëpisë.
6 muaj pas arratisjes, konkretisht më 18 mars 2011, Admir Tafili qëllon për vdekje pas një prite pranë banesës së tyre, dy vëllezërit e ish-shefit të krimeve Prelë Pjetrushi, shtetasit Nik dhe Gjovalin Pjetrushi. Këta të fundit ishin kthyer në atdhe për disa ditë pushim, por u ekzekutuan në mes të rrugës.
Tafili mbërrin në Tiranë dhe krejt i qetë ulet në një lokal në afërsi të Repartit Special RENEA. Konsumon një birrë dhe lajmëron policinë e Tiranës se ishte gati që të dorëzohej.
Gjykata e dënoi Admir Tafilin me burgim të përjetshëm, por ai u arratis nga Burgu i Drenovës në vitin 2013. Pas disa orësh, Admiri arrestohet bashkë me disa të dënuar të tjerë në afërsi të fshatrave të Librazhdit.
Aktualisht Admir Tafili vijon të vuajë dënimin e përjetshëm edhe me disa akuza të tjera të rënda pasi dyshohet se nga burgu drejtonte një organizatë, e cila kryente vrasje me pagesë.
Lirimi me kusht i vëllait të Admirit, Genc Tafilit shkaktoi shumë reagime. Fillimisht ishte Prokuroria e Krujës ajo që kundërshtoi vendimin e sotshëm të Gjykatës së Krujës për ta liruar me kusht Gencin.
Kështu, Prokuroria e Krujës ka ankimuar në Gjykatën e Apelit lirimin e Tafilit, me argumentin se vepra për të cilën ai është dënuar, nuk përfiton lirim me kusht dhe se vendimi i gjykatëses Enkeleda Hoxha është në kundërshtim të hapur me ligjin.
Menjëherë më pas reagoi edhe Presidenca, me anë të një njoftimi, ku Meta urdhëronte Inspektoriatin e Këshillit të Lartë të Drejtësisë, që të fillonte urgjentisht verifikimin e rastit në fjalë dhe veprimtarinë proceduriale të kësaj gjykate.
Por, çfarë ka thënë Genc Tafili për vrasjen e Zylyftarit?
“Shteti asnjëherë nuk u mundua të zbardhte ngjarjen që na shkatërroi. Si u vra Zylyftari? Pse u soll ai në operacionin për kapjen e babait tim kur ky lëvizte çdo ditë nëpër qytet, në peshkim ku kishte biznesin dhe mund të kapej kurdo? Gjithçka ishte kurth për të vrarë Arben Zylyftarin. Ai më ka vrarë babën të dorëzuar dhe desh të më vriste dhe mua për të humbur gjurmët. Nuk kam shpresë te ky shtet. Ndoshta duhen të tjera viktima, këtë herë nga pala jonë, që shteti të vërë mend”, është shprehur Genci në një apel të fundit nga burgu për shtetin./ Tirana Today
