Policia e Shtetit ka dhënë detajet lidhur me ngjarjen e rëndë që ndodhi mbrëmjen e sotme në qyteti e Vlorës dhe ku mbeti i plagosur një 36-vjeçar.
Sipas policisë, viktima është qëlluar në ambientet e një lokali ndërsa autori është larguar mes rrugicave të pallateve.
Në njoftimin e dërguar nga Policia e Shtetit theksohet se viktima ka qenë me precedent penal të mëparshëm dhe për këtë arsye ka ndërruar emrin dhe mbiemrin e tij.
Ndërsa bëhet e ditur se Forcat e Ndërhyrjes së Shpejtë janë duke krehur zonën për kapjen e autorit dhe zbardhjen e ngjarjes.
Njoftimi i policisë:
Më datë 30.07.2017 rreth orës 21:15, jemi njoftuar së në një lokal në Lungomare ka pasur të shtëna me armë zjarri ku dyshohet se ka një person të vrarë. Menjëherë në drejtim të vendit ku u dha njoftimi kanë shkuar forca të shumta policie ku ka rezultuar se: Shtetasi M.Xh.(O), 37 vjeç, është qëlluar me armë zjarri, për pasojë ka ndërruar jetë.
Viktima ka qenë në lokal i ulur me një tjetër, ku në drejtim të tij është afruar një person i cili e ka qëlluar me armë zjarri. Autori është larguar më këmbë mes pallateve. Policia ka ngritur menjëherë pika të shumta kontrolli ku në ndihmë të Policisë së Vlorës për kapjen e autorit kanë ardhur Delta Forcë e FNSh. Vijon krehja e zonës për të bërë të mundur kapjen e autorit. Grupi hetimor në vendngjarje po vijon punën për grumbullimin e provave, dëshmive me qëllim dokumentimin dhe identifikimin e autorit.
Në vendngjarje janë sekuestruar disa gëzhoja ndërsa disa metra më tutje është gjetur dhe sekuestruar një armë zjarri pistoletë që dyshohet se e dispononte viktima M.Xh.(O)
Theksojmë se viktima ka ndërruar emër e mbiemër dhe rezulton me precedent kriminal. Vijon puna për zbardhjen e plotë të rrethanave të ngjarjes, identifikimin dhe kapjen e autorit.