Gjykata ka caktuar masën e sigurisë “arrest me burg”për tre autorët e arrestuar si të dyshuar për vrasjen e kushërinjve në Laç. Dy prej të arrestuarve kanë shprehur pendesë, ndërsa Manuel Bushi ka heshtur.
“Jam penduar për atë që kam bërë, nuk kam dashur që t’i vras,”– ka thënë Markel Bushi, i cili më pas ka shpërthyer në lot në gjyq.
Ndërkohë që Vinçens Bushi ka treguar se dy kushërinjtë në sherr e sipër e kanë goditur me sende te forta.
“Më goditën me sende të forta, ndaj dhe ka agravuar situata deri në përdorimin e armëve”.
Tre të akuzuarit për vrasjen e Mikel dhe Jani Jushit mbërritën në gjykatë nën masa të rrepta sigurie. Dyshohet se shkak për vrasjen është bërë një debat që ka nisur për publikimin e fotove në rrjetet sociale.
Tre autorët e dyshuar të ngjarjes ishin të njohur me njëri-tjetrin dhe mes tyre ka nisur fillimisht me shaka një debat për foton që ish-futbollisti, Kelvin Jushi, publikonte në profilin e tij në rrjetet sociale. Fjalë pas fjale, debati mes dy grupeve është acaruar, duke bërë që të dalin jashtë për t’u sqaruar.
Por, situata është përshkallëzuar më tej, duke bërë që palët të përleshen fizikisht. Më tej, një prej vëllezërve Bushi ka nxjerrë një armë tip pistoletë. Dy të rinjtë, Kelvin dhe Erion Jushi, pasi kanë parë armën, kanë tentuar që të largohen, por janë ndjekur nga pas nga 24-vjeçari, i cili i ka qëlluar në hyrjen e një pallati, raporton Panorama.
Vetë autori i dyshuar i ngjarjes ka deklaruar në Polici se ka qëlluar në gjaknxehtësi e sipër në drejtim të ish-futbollistit, ndërkohë që 36-vjeçari Jushi, sipas Markel Bushit, ka mbetur i vrarë aksidentalisht.
“Debatuam për ‘Facebook’, pastaj u përleshëm dhe situata doli jashtë kontrollit. Nxora pistoletën për t’i trembur, po në gjaknxehtësi e sipër nisa të qëlloja. Nuk kisha për qëllim t’i vrisja”, ka thënë 24- vjeçari Markel Bushi, që dyshohet se është autori kryesor i ngjarjes.
