Gjykata e Tiranës ka caktuar dje masën e sigurisë “arrest me burg” me afat 45-ditor për Geldo Hotin. Ky i fundit u arrestua në Kakavijë si pjesë e sherrit me armë që ndodhi në zonën e ish-Bllokut.
Ai ka qenë në tavolinë me Ervin Matën, të dashurin e Elvana Gjatës. Në Gjykatë Hoti tha se nuk ka qëlluar me armë dhe se ka qenë i paarmatosur. Seanca u zhvillua më pas me dyer të mbyllura për shkak të sekretit hetimor, me kërkesë të prokurorit Lulaj.
“Kam dëgjuar krisma dhe menjëherë jam futur poshtë tavolinës i tronditur. Nuk kam qëlluar, kam qenë pa armë. Më pas jam larguar për në Greqi sepse do të merrja një pajisje”, ka thënë Hoti.
Gjyqtari Artan Gjermeni i dha 45 ditë kohë Prokurorisë që të sjellë prova më të forta për Hotin dhe rolin e tij në përplasjen me armë.
Hoti, Ervin Mata dhe Meviol Bilo po rrinin në një tavolinë, ndërkohë që kanë ardhur Fabian Gaxha, Eljon Hato dhe Ervis Martinaj, raporton Panorama.
Sipas dëshmive, Martinaj dhe Mata janë takuar normalisht, por sherri ka nisur mes Fabian Gaxhës dhe Meviol Bilos. Pas të shtënave, Gaxha ka mbetur i vdekur në vend, me një plumb në kokë dhe gjoks.
