Policia e Tiranës ka “blinduar” banesat e vëllezërve Griseldo dhe Albano Kusi, të cilët akuzohen për vrasjen e 26-vjeçarit Indrit Çelaj.
Uniformat blu kanë kryer kontrolle të imtësishme në banesat e dy vëllezërve, në kryeqytet, raporton “BalkanWeb”. Gjatë kontrollit policia ka gjetur armë, në një banesë të vëllezërve Kusi, në fshatin Allgjatë.
26-vjeçari Indrit Çelaj ishte duke kryer punime për kondicionimin në një vilë trekatëshe në rrugën “Muhamet Gjollesha”.
Sipas dëshmive të dy punëtorëve në vilën ku punonte Indrit Çelaj, në momentin kur u vra, ndaj tij ka qëlluar Griseldo Kusi.
Sipas tyre, Griseldo Kusi (Eldo siç e thërrisnin), ka ardhur i vetëm në objekt atë ditë. Ai sipas tyre vinte disa herë për të kontrolluar punimet. Me të dëgjuar një zhurmë trapani në një nga tualetet e katit të parë ku po punonte Indit Çelaj, Griseldo Kusi kishte shkuar atje i nervozuar, sipas dëshmive të punëtorëve.
“Po këtu ç’bëhet”, i kishte bërtitur ai me zë të lartë Çelajt, “Çfarë po bën, përse e hap atë vrimë aty dhe ku do e çosh shkarkimin e kondicionerëve”, kishte vazhduar ai.
Sipas dëshmive, Indrit Çelaj i ishte përgjigjur se nuk e dinte se ku do të ishte shkarkimi. Griseldo më pas i tha “kur se di ti, nga do ta di unë?”. Në këtë moment ai kishte nxjerrë pistoletën, dhe ia kishte vendosur në kokë Indrit Çelës dhe më pas kishte qëlluar.
