Dosja e punëtorit të kondicionerëve Indrit Çela, tashmë është zbardhur e plotë. I riu humbi jetën në datën 22 gusht nga një plumb në kokë, e ndërsa autor i dyshuar i ngjarjes është Griseldo Kusi, i cili është shpallur në kërkim nga policia.
Në dëshmitë e zbardhura nga prokuroria, babai i Griseldo Kusit, Bujar Kusi, i cili ndodhet në qelli, i akuzuar për “veprime që pengojnë zbardhjen e së vërtetës”, thotë se djemtë e tij, ditën e ngjarjes kanë qenë në plazh së bashku me dy shoqe.
Ai ka deklaruar se rreth orës 11:00 e ka marrë në telefon djali i tij, shtetasi Griseldo Kusi, i cili i ka kërkuar 50 mijë lekë të rinj. Teksa e ka pyetur se për çfarë i duheshin ato lekë, ai i ka thënë se do të dalë me të vëllanë dhe dy shoqet e tyre. Bujar Kusi i mëshon faktit se djemtë e tij ndodheshin në plazh, tek Gjiri i Lalëzit, në Durrës, me dy shoqet e tyre, të cilat ai nuk i njeh.
Dëshmia e Bujar Kusit:
“Fillimisht i është marrë procesverbal deklarimi shtetasit Bujar Kusi, si person që ka dijeni për rrethanat objekt hetimi, pronar i banesës, i cili ndër të tjera ka deklaruar se: “Sot më datën 22 gusht, në orën 07:00 të mëngjesit, kam shkuar në Kombinat tek dyqani im, i cili ndodhet në qendër të Kombinatit, është byrektore.
Aty kam qëndruar deri në orën 12:30. Rreth orës 11:00 më ka marrë në telefon djali im, shtetasi Griseldo Kusi dhe më ka kërkuar shumën e parave prej 50 mijë lekësh të rinj. Unë e kam pyetur se për çfarë i duhen dhe ai më ka thënë se do të dalë ai dhe vëllai, Albano me dy shoqe. Unë më pas shkova dhe tërhoqa shumën e parave që më kërkoi djali tek banka. Kam edhe faturën e bankës në banesë dhe këtë shumë parash ua kam dhënë dy djemve. Më pas unë shkova në banesën time, të cilën e sqarova më lart. Ndërkohë që kam qenë në banesë, dikush i Policisë më ka telefonuar dhe më ka thënë se duhet të paraqitesh tek objekti, i cili ndodhet në rrugën “Muhamet Gjollesha” , banesë private 3-katëshe, prapa shkollës “Sabaudin Gabrani”, ku unë jam pronar dhe kam qenë duke rregulluar tubat e kondicionimit të kësaj banese.
Jam paraqitur te banesa ime dhe aty mësova se çfarë kishte ndodhur. Rreth orës 13:55, ndërkohë që unë kam qenë në objekt në prani të punonjësve të Policisë, unë kam marrë në telefon shtetasin Mond Sula dhe i kam thënë se kush janë punëtorët e kondicionimit që më ka sjellë. Mondi më ka thënë se paskan bërë sherr Lorenc Veliaj me këtë punëtorin e kondicionerit dhe Lorenci e paska qëlluar me armë zjarri punëtorin e tubave të kondicionerit, të cilin me emër nuk e njoh, por mësova se ishte në gjendje të rëndë shëndetësore në Spitalin Ushtarak. Të dy djemtë e mi, Albano dhe Griseldo, në dijeninë time ndodheshin në plazh, tek Gjiri i Lalëzit, në Durrës, me dy shoqet e tyre, të cilat nuk i njoh”.
