Pas vrasjes së gazetarit investigativ dhe të dashurës së tij, policia sllovake është vënë në lëvizje për kapjen e autorëve. Ajo ka marrë edhe mbështetjen e qeverisë, teksa kryeminsitri i Sllovakisë, Robert Fico, ofroi një milion euro shpërblim për secilin që mund të ketë informacione për vrasjen e gazetarit 27-vjeçar.
Jan Kuciak dhe e dashura e tij Martina Kusnirova, janë qëlluar për vdekje në shtëpinë e tyre, ndërsa u gjetën me plagë nga arma e zjarrit të dielën.
Dyshohet se vrasja e tij ka ardhur për shkak të investigimeve të bëra së fundmi nga i riu, ndërsa mediet vendase kanë publikuar artikullin e fundit të Kuciakut, i cili lidh mafian italiane me korrupsionin politik, të nivelit të lartë, në Sllovaki.
Shefi i policisë sllovake, Tibor Gasapr, tha se autoritetet kanë marrë në pyetje 20 veta qysh të hënën dhe se kanë kontaktuar edhe Republikën Çeke, edhe Italinë në lidhje me hetimet.
