Bujar dhe Florian Daka janë shpallur në kërkim nga policia, pasi dyshohet se janë porositësit e vrasjes së ish-kryekomisarit Artan Cuku.
Dy vëllezërit nga Shkodra u shpallën në kërkim sot paradite, ndërsa dyshohet se ata janë porositësit e ekzekutimit me motiv gjakmarrjen.
Vëllai i tyre, Agim Daka është vetëvrarë në polici disa vite më parë me armën e komisar Cukut.
Por, kush është Agim Daka?
Një nga momentet më të rënda të Cukut në Policinë e Shtetit ka qenë një ngjarje e ndodhur në vitin 2005. Në mars të atij viti, Agim Daka, 25 vjeç nga Shkodra, vrau veten me armën e Artan Cukut, shkruan “Panorama”.
Ngjarja ndodhi brenda në zyrat e Policisë së Shtetit në Tiranë, ku viktima u shoqërua pasi ngjante shumë me të vëllanë, Bujar Daka, i cili ishte arratisur nga Policia e Shkodrës.
Më konkretisht, viktima Agim Daka, teksa po merrej në pyetje në zyrën e shefit të Krimeve të Komisariatit nr.4, Artan Cuku, arriti t’i merrte armën këtij të fundit duke qëlluar veten me armën e shefit të Krimeve të Policisë, dhe mbeti i vrarë në vend. Kjo ngjarje ishte një incident i rëndë për Artan Cukun, i cili u pezullua nga detyra për disa javë, derisa hetimi e nxori të pastër nga kjo ngjarje.
Pavarësisht vendimit të organeve drejtuese të Policisë, familjarët e Agim Dakës bënë akuza publike ndaj Policisë, edhe ndaj Artan Cukut teksa akuzuan se Agim Daka ishte dhunuar fizikisht e psikologjikisht për të treguar informacione në lidhje me vendndodhjen e vëllait të tij.
Agim Daka ishte shoqëruar nga Policia në zonën e Vorës, ku u ndalua nga një postbllok i Komisariatit nr.4.
Ai u ngjau policëve me të vëllanë, Bujar Dakën, i cili ishte larguar nga komisariati i Policisë së Shkodrës, ku kishte qenë i ndaluar. Ndërkohë, në mesin e shkurtit 2005, gruaja e Agim Dakës ishte gjetur pa jetë dhe nga hetimet doli se kishte humbur jetën nga helmimi.
Në momentin kur kreu vetëvrasjen me armën e Artan Cukut, mësohet se Agim Daka ka qenë duke u marrë në pyetje në zyrat e Policisë pikërisht për vendndodhjen e vëllait të tij, që ishte arratisur nga Policia e Shkodrës.
Cuku ka shpjeguar se as vetë nuk e kishte kuptuar se si i ndaluari kishte marrë armën e tij dhe kishte qëlluar veten në kokë, duke gjetur vdekjen e menjëhershme.
