Dy muaj pas vrasjes së teknikut të kondicionerit në një vilë në zonën e “Myslym Shyrit”, policia e Tiranës ka arrestuar Lulzim Kusin, xhaxhain e dy vëllezërve Kusi, të akuzuar si autorët e ngjarjes. Albano dhe Griseldo Kusi, dy vëllezër, akuzohen se vranë Indrit Çelën, i cili punonte në banesën e tyre.
Sakaq, xhaxhai i tyre, Lulzim Kusi është vënë në pranga pasi gjatë kontrollit që është ushtruar nga policia në banesën e tij më 6 shtator, kur po kërkohej për autorët, atij iu gjet një armë zjarri pa leje, e llojit kallashnikov. Me ndryshimet e bëra në Kodin Penal, Kusi rrezikon 15 vite burg për “armëmbajtje pa leje”.
Po kështu ka hije dyshimi se banesa e xhaxhait, është përdorur nga 2 nipërit e tij për t’u fshehur pas krimit të rëndë, dhe për t’u larguar më pas jashtë vendit.
26-vjeçari Çelaj u vra me plumb në kokë, në banesën e vëllezërve Kusi, në zonën e “Myslym Shyrit”, teksa ishte duke punuar për kondicionimin.
Ngjarja ka nisur me një sherr mes të riut dhe dy vëllezërve për një kondicioner, ndërsa më pas, vëllezërit e kanë qëlluar punëtorin e tyre.
26-vjeçari u transportua me urgjencë në spital, por nuk mundi t’i mbijetojë plagëve, duke ndërruar jetë një ditë më vonë.
