Gjykata e Elbasanit ka lënë në burg Sokol Sanxhaktarin dhe Ardiano Hajdarin, për vrasjen e Florian Lamçes. Ata akuzohen se kanë vrarë me mjete të forta dhe shishe shokun e tyre, Florian Lamçen, pasi kishin pirë gjithë natën.
Ngjarja e rëndë ndodhi më 30 korrik ku Florian Lamçe, 40 vjeç, u vra me mjete të forta në qendër të qytetit të Elbasanit. Lamçe së bashku me Hajdarin dhe Sanxhaktarin kanë qenë së bashku në një lokal pranë qendrës së qytetit, madje postuan edhe foto të përqafuar në rrjetet sociale duke pirë. Rreth orës 05:30, u përleshën në bisedë e sipër dhe si pasojë e goditjeve me shishe dhe sende të tjera të forta, Florian Lamçe ndërroi jetë.
Dy ditë më parë, Sanxhaktari, dhëndri i ish-kryetarit të Bashkisë Elbasan, ka dëshmuar në polici për ngjarjen e rëndë ku humbi jetën shoku i tij.
Në dëshminë e dhënë, 34-vjeçari Sanxhaktari ka thënë se nuk e kujton si ka nisur debati mes tyre dhe se me viktimën ishin miq.
“Florin e kam shok. U takuam pasdite dhe kemi qenë në disa lokale. Në darkë u ulëm me Ardianon dhe me Florianin te lokal ‘Piazza’ dhe kemi pirë shumë pije të ndryshme. Nuk e kujtoj as si nisi debati dhe as pse më qëlloi dhe e qëllova. Jam i shokuar. Nuk e di si ka ndodhur. Ne jemi miq”, mësohet të ketë thënë Sanxhaktari para oficerëve të Policisë Gjyqësore.
