Votat preferenciale / Xhafaj, Rakipi e Boçi shënojnë surprizën e zgjedhjeve

Fatmir Xhafaj dhe Ornaldo Rakipi nga PS dhe Luçiano Boçi nga PD janë tri emrat që i kanë dhënë kuptim votimit preferencial në një listë kandidatësh me shumë komplikime në zgjedhjet e së dielës së 25 Prillit.  Fatmir Xhafaj me 10972 vota, i renditur si numri 23 vota, dhe Ornaldo Rakipi 10424 vota, i renditur si numri 30, kanë thyer herësin duke fituar vendin në Kuvend e duke spostuar, të paktën nga numërimi i deritanishëm, përkatësisht Eduard Shalësin dhe Alqi Bllakon.

Ndërkaq, Boçi, që renditej i shtati në listën e PD-së në Elbasan, ku kjo parti ka fituar 6 mandate, deri më tani rezulton se sposton nga lista kandidatin Eugen Isaj, i renditur i 5-ti. Boçi sposton një nga kandidatët meshkuj, ndërkohë që kandidatja e rreshtuar e gjashta, Zheni Gjergji, përfiton nga Kodi zgjedhor që mbron gjininë femërore në këtë betejë votash.

Ndërkaq, Pandeli Majko, Mimi Kodheli dhe Ilir Beqaj janë tri emrat më të spikatur, nga bashkëpunëtorët e kryeministrit Rama, që mbeten jashtë Parlamentit. Ndërsa nga PD, për pak vota nuk ka arritur të hyjë në Kuvend Bardh Spahia, i cili edhe si i shtati në listë, edhe si vota preferenciale, ishte shumë pranë fitimit të mandatit të deputetit.

Kur mbeten dhe pak kuti të numërohen, duket se surprizat të tjera janë gati të pamundura për të kapërcyer herësin, siç ndodhi në Tiranë dhe Elbasan. Ndërkohë, nuk janë të paktë kandidatët nga të dy anët politike që kanë shtuar zërat për një penalizim të votës preferenciale pasi kanë bërë fushatë më shumë për numrin rendor të partisë apo koalicionit në listë se sa kanë kërkuar mbështetje preferenciale.