Policia e Vlorës ka bërë të mundur gjetjen dhe sekuestrimin e armës së zjarrit që dyshohet se u përdor nga 17-vjeçarja në ngjarjen tragjike të ndodhur më 14 korrik 2025, në lagjen “Kushtrimi”.
Sipas njoftimit zyrtar, arma e llojit pistoletë u gjet pranë banesës së gjyshërve të të miturës, në një vend ku grumbulloheshin materiale të ndryshme shtëpiake. Ajo ishte fshehur brenda një qeseje plastike. Sekuestrimi i saj u bë në kuadër të hetimeve për zbardhjen e plotë të rrethanave të ngjarjes.
Arma tashmë do t’i dorëzohet Institutit të Policisë Shkencore për ekzaminime balistike dhe gjurmësh, në funksion të dokumentimit të plotë të rastit dhe konfirmimit të përdorimit të saj nga e mitura.
Materialet procedurale shtesë i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Vlorë për veprime të mëtejshme. Ndërkohë, 17-vjeçarja vijon të jetë nën kujdesin intensiv të mjekëve, pasi mbeti e plagosur rëndë nga të shtënat.
