Vllaznia ka arritur të marrë fitoren e dytë radhazi dhe të tretën sezonale, pasi ka mposhtur Luftëtarin me rezultatin 2-1. Ndeshja ka qenë e hapur nga fillimi i takimit deri në fundin e tij, pasi të dy ekipet kanë luajtur shumë hapur dhe por dygolëshi i Gilman Likës bëri që në fund të festonin shkodranët. Sfida nis në ritme të larta për vendasit të cilët gjejnë golin që në minutën e 8’ të takimit. Është Gilman Lika që ekzekuton mjeshtërisht një goditje dënimi dhe pas një devijimi të lehtë të mbrojtësit gjirokastrit Ramadani topi përfundon në rrjetë.
Reagimi i miqve ka qenë mjaft i shpejtë, por Orelesi e argon topin nga vija fatale pas një pasigurie të portierit Selimaj. Sërish në të parën është Luftëtari më këmbëngulës që i afrohet golit edhe në minutën e 23’ pas një gabimi në mbrojtje dhe më pas pretendohet për një faull në zonë ndaj Abazaj, por për arbitrin gjithçka ka qenë e rregullt. Në të 32-tën, vendasit humbën mundësinë për të dyfishuar rezultatin me Hasanin, që u ndal nga portieri Ruçi, ndërsa 2 minuta më pas, ishte Erald Çinari që gaboi përballë portierit gjirokastrit. 3 minuta nga fundi i pjesës së parë, gjirokastritët fitojnë një faull pranë zonës së Vllaznisë, të cilin e ekzekutoi mjeshtërisht Dejvi Bregu, duke baraspeshuar shifrat. Bregu edhe në të dytën kishte një rast mjaft të mirë për të shënuar, por këtë herë portieri Selimaj bën një pritje mjaft të mirë. Shkodranët vijuan të kërkonin golin e fitores në mënyrë të vazhdueshme, por terreni I rënduar nuk e bënte aspak të lehtë ndërtimin e aksioneve. Gjithsesi, në minutën e 83-të, ishte sërish kapiteni Gilman Lika, që ndëshkoi sërish portierin gjirokastrit Ruçi dhe i dha fitoren Vllaznisë.
Kamëz 2-1 Lushnja
Në Kamëz, Lushnja e nisi në mënyrë perfekte takimin, duke gjetur avantazhin që në minutën e 6’, me anë të sulmuesit Mikel Canka. Gjithsesi, Kamza nuk zhgënjeu as këtë herë, teksa vendosi baraspeshën vetëm 10 minuta më pas, me një supergol të kapitenit Sebino Plaku, ndërsa serbi Raçiç i dha avantazhin skuadrës së Ndreut, 5 minuta para mbylljes së pjesës së parë.
Edhe pjesa e dytë ishte mjaft interesante, me Lushnjën që u mundua të gjejë barazimin, por që nuk kishte fuqinë e duhur për të dërguar topin në rrjetën e portierit Halili. Nga ana tjetër, skuadra e Ndreut arriti të administrojë mirë avantazhin, të cilin mund ta kishte thelluar edhe më tej, në 2-3 momente.
