Vllaznia vazhdon të zhgënjejë dhe të pësojë sërish një humbje në një moment mjaft delikat kur bëhet fjalë për mbijetesën në Superiore. Pas humbjen me rivalin direkt, Teutën në Durrës, të besuarit e Ernest Gjokës janë mposhtur edhe në “Loro Boriçi” nga Luftëtari.
Pritej që shkodranët në këtë sfidë të jepnin maksimumin dhe të ishin të rrezikshëm, por ndodhi e kundërta, pasi skuadra e Hasan Likës qëndroi e tërhequr mbrapa dhe goditi me anë të kundërsulmeve të shpejta.
Golat për gjirokastritët u shënuan të dy në pjesën e dytë dhe patën për protagonistë dy prej yjeve të Luftëtarit, Kristal Abazajn dhe Dejvi Bregun. Fillimisht ishte lojtari më i ri i Anderlechtit, që bëri çfarë deshi me Mersinin në zonë dhe më pas mposhti portierin Sherri, duke dërguar topin në rrjetë nga një kënd shumë i vështirë.
Më pas, talenti vlonjat shënoi golin e dytë, pas një aksioni mjaft të bukur, që pa për protagonist vetë Bregun dhe fantazistin Rroca. Vlen të përmendet se publiku shkodran duartrokiti fillimisht Abazajn kur u zëvendësua nga Lika, ndërsa më pas edhe Bregun, teksa në shenjë mosmiratimi për situatën ku ndodhet Vllaznia, u larguan shumë më herët nga stadiumi.
Nga ana tjetër, Kamza është rikthyer te fitorja pas 9 javësh, teksa ka mposhtur Lushnjën me rezultatin 2-1, ndonëse jo pa vështirësi. Gjithçka u zhvillua në pjesën e dytë, teksa Sebino Plaku shënoi të dy golat për skuadrën e Julian Ahmatajt, ndërsa Sefa barazoi përkohësisht për Lushnjën.
Me këtë fitore, Kamza shkëputet me 4 pikë nga Vllaznia dhe Teuta, duke hedhur një hap drejt qëndrimit në Superiore, ndërsa durrsakët do ta luajnë nesër takimin e tyre, në Vlorë përballë Flamurtarit.
