Sot Zyra e Informimit të BE me kryesuesen e delegacionit evropian në Shqipëri, ambasadoren Vlahutin dhe ministrja e Administratës Publike, Milena Harito kanë mbajtur një konferencë të përbashkët. Bashkimi Europian ka shprehur mbështetje për progresin e reformës në shërbimin civil në vendin tonë. Mes të tjerash Romana Vlahutin tha se reforma në administratë është një nga më të vështirat.
Ambasadorja e BE theksoi se kjo reformë është një nga prioritetet kyç për integrimin europian të vendit dhe se puna në administratë nuk është për gjithë jetën, dhe për këtë duhet të ndryshohet mendësia. Në këtë mënyrë, ambasadorja dha një mesazh se qeveria e ardhshme duhet të punojë me tej për realizimin e plotë të reformës së administratës.
“Reforma e administratës publike është nga më të vështirat. Puna në administratë mendohet për gjithë jetën. Duhet të ndryshohet kjo mendësi. Reforma në drejtësi, në administratë, në arsim, janë kyçe për integrimin. BE jep 32 milionë euro suport për këtë reformë. Në muajt e fundit ka patur përmirësim dhe arritje. Qeveria e ardhshme të punojë fort në këtë drejtim në mënyrë që administrata të jetë gati kur të nisin negociatat për anëtarësim”, u shpreh ambasadorja Vlahutin.
Ministrja e Shtetit për Inovacionin dhe Administratën Publike, Milena Harito, vuri në dukje se reforma administrative është prioritet për mandatin e dytë qeverisës.
“Kjo reformë e administratës është detyrim për integrimin e vendit në BE. Deri më tani janë bërë ndryshime të mëdha në rekrutimin e shërbimit civil. Futëm për herë të parë sistemin e karrierës”, tha mes të tjerash ministrja Harito.
