Qyteti Elbasanit pret ditën e enjte në stadiumin “Elbasan Arena”, sfidën mes Skënderbeut dhe Partizanit të Beogradit, në kuadër të fazës së grupeve në Europa League. Në Elbasan do të ketë një dyndje të forcave të policisë për të bërë të mundur mbarëvajtjen e kësaj ndeshje, pasi duke pasur parasysh episodet në të kaluarën pritet të jetë shumë e nxehtë dhe delikate në shkallët e stadiumit. Përpos Policisë së Shtetit, në Elbasan të enjten do të zbarkojnë edhe forcat RENEA dhe ato të Ndërhyrjes së Shpejtë. Do të ketë një kontroll të imtësishëm të tifozëve para se të futen në stadium dhe personat që janë identifikuar si problematikë nuk do të lejohen të futen në stadium. Një kontroll i veçantë do të jetë edhe për tifo-grupet, pasi të gjitha banerat do të kontrollohen për tu siguruar që të mos kenë në brendësi mesazhe politike.
