Pedagogia Dhurata Shehri ka ironizuar zgjedhjen e kryetarit të Akademisë së Shkencave, Skënder Gjinushi. Teksa ka publikuar një pjesë të CV-së së Gjinushit, Shehri shprehet se ka gabuar rëndë nëse ka menduar se në Shqipëri mund të ketë ende ndonjë akademik.
Në CV dallohet qartë sipas Shehrit, kontributi i 30 viteve të fundit të Gjinushit. Nga CV që ajo ka ndarë me të gjithë ndjekësit në profilin e saj në Facebook, shihet se si Gjinushi ka bërë një kapërcim nga pedagog i matematikës, në politikan.
Ndryshimi evidentohet në vitet 1987–1991, ku Skënder Gjinushi ka qenë deputet i Kuvendit Popullor dhe Ministër i Arsimit.
Statusi
“Gabova rëndë ku mendova se kishte mbetur ende ndonjë akademik në Shqipëri! Duke nisur nga “kryetari”, CV-në e të cilit ju ftoj ta lexoni për te gjetur kontributin shkencor te 30 viteve të fundit!
Skënder GJINUSHI (1949–). Matematikan, profesor, akademik. Lindi në Vlorë. Shkollën e mesme e kreu në Tiranë dhe përfundoi studimet e larta në Universitetin e Tiranës në vitin 1972. Gjatë viteve 1973–1977 kreu studimet pasuniversitare në Francë (Universiteti Pierre e Marie Curie, Paris VI) dhe fitoi titullin “Doktor” i ciklit të tretë në analizën funksionale. U emërua pedagog në katedrën e matematikës së specialitetit në Fakultetin e Shkencave Natyrore të Universitetit të Tiranës (1972).
Skënder Gjinushi ka botuar tekstet “Bazat e topologjisë së përgjithshme” (1986), “Analiza funksionale” (1988), “Probleme të analizës funksionale (1992) dhe një varg artikujsh shkencorë në fushën e analizës funksionale. Në vitet 1987–1991 ka qenë deputet i Kuvendit Popullor dhe ministër i Arsimit. U aktivizua në proceset politike pluraliste dhe më 1991 u zgjodh kryetar i Partisë Socialdemokrate të Shqipërisë, funksion që vazhdon ta mbajë. Nga viti 1992 deputet në Kuvendin e Shqipërisë, kryetar i Kuvendit (1997–2001); zëvendëskryeministër e ministër i Punës dhe i Çështjeve Sociale (2001–2002)”.
