Në thirrjen e dytë të Programit Interreg IPA II Greqi Shqipëri 2014-2020 janë shpallur 40 projekte fituese.
Lista e publikuar e këtyre projekteve dëshmon sërish dështimin e Shqipërisë, vetëm pak ditë pas dështimit në Samitin e Triestes.
Në këtë listë Shqipëria ka fituar vetëm 3 projekte nga 40 të tilla, ndërsa 37 projektet e tjera i ka fituar Greqia, shifër kjo që kalon dhjetëfishin e projekteve të fituara nga vendi ynë.
Por, kush janë fituesit shqiptarë?
E para është Agjencia Kombëtare e Burimeve të Natyrës me një vlerë projekti prej 596 mijë eurosh.
I dyti renditet Agjencia për Zhvillim ekonomik dhe lokal AULEDA me një vlerë projekti prej 678 mijë eurosh
I treti është Instituti për Kërkime Urbane me një vlerë rreth 700 mijë euro.
Në total, Shqipëria ka përfituar më pak se 2 milionë euro.
Ndërkohë, Greqia ka përfituar një listë të gjatë projektesh me organizata dhe institucione si: Agjencia e Baseneve të Ujit në Janinë, Agjencia e Menaxhimit të Parkut në Zakinthos, Bashkia e Prespës, Bashkia e Ziros, Qendra Kërkimore e Universitetit të Janinës, Dhoma e Zhvillimit Tregtar në Artë.
Lista është e gjatë dhe projektet kanë një shtrirje të jashtëzakonshme që nis nga uji deri tek polifonia.
Por, më shumë se numri i projekteve, është për t’u pasur zili vlera që do t’u shkojë komuniteteve përmes tyre.
Në total vlera është rreth 25 milionë euro duke lënë shumë pas pjesën që ka përfituar Shqipëria nga e njëjta garë.
Projekti:
Interreg Greqi-Shqipëri këtë herë të paktën për pjesën e Shqipërisë ishte i fokusuar në qarkun e Gjirokastrës, Beratit Vlorës dhe Korçës, raporton Monitor.al.
Objektivi i projektit është gjetja e ekuilibrit midis zhvillimit të qëndrueshëm rajonal dhe zgjerimi i bashkëpunimit ndërkufitar midis popullsisë rajonale dhe institucioneve vendore, e gjitha kjo në përputhje me politikat kombëtare dhe ato të Bashkimit Evropian, në mënyrë që sfidat e përbashkëta të adresohen ashtu siç duhen.
Prioritete të programit cilësohen promovimi i turizmit, transportit dhe infrastrukturës, si dhe nxitja e ekonomisë lokale.
