Në sajë të Samitit të Kartës së Adriatikut, zv/Presidenti i SHBA-ve, Mike Pence do të zhvillojë sot një takim të përbashkët me presidentin e Kosovës, Hashim Thaçin dhe kryeministrin e Shqipërisë, Edi Rama.
Ky Samit zhvillohet në Mal të Zi, ku Pence mbërriti mbrëmjen e djeshme dhe u prit me nderimet më të larta shtetërore nga kryeministri malazez Dushko Markoviç.
Ky i fundit organizoi mbrëmjen e djeshme një darkë, ku ishin të pranishëm presidenti Filip Vujanoviç dhe kreu i Kuvendit, Ivan Brajoviç, si dhe ministri i Jashtëm, Sergjan Darmanoviç dhe ai i Mbrojtjes, Predrag Boshkoviç.
Gjatë fjalës së tij në konferencën për shtyp së bashku me kryeministrin Dushko Markovic, Mike Pence deklaroi se e ardhmja e Ballkanit perëndimor është në Bashkimin Europian, si dhe përshëndeti anëtarësimin e Malit të Zi në NATO:
“Guximi juaj, veçanërisht në ballafaqim me presionin rus, e inspiron botën dhe unë ju lavdëroj për këtë. Udhëtimi im në këtë vend të vogël me 620 mijë banorë është testament për faktin se Amerika nuk ka aleatë të vegjël, por ka vetëm aleatë të fortë.”
Vizita e Pence në Mal të Zi konsiderohet si “vizita e shekullit”, ndërsa për analistët ndërkombëtare ajo demonstron kthimin e SHBA-ve në Ballkan.
Për qeverinë e Malit të Zi, vizita e zv/presidentit amerikan është një dëshmi e marrëdhënieve shumë të mira të Malit të Zi me Shtetet e Bashkuara dhe partneritet strategjik të dy vendeve.
