Vizita dy ditore e presidentit shqiptar, Bajram Begaj në Kosovë është shoqëruar me pakënaqësi nga ana e LDK-së. Presidenti Bajram Begaj ka takuar liderët e partive opozitare në Kosovë, por jo kryetarin e Lidhjes Demokratike të Kosovës, Lumir Abdixhikun. Të dy nuk kanë arritur dakordësinë për vendin kur duhej mbajtur takimi. LDK në një prononcim për Telegrafin ka thënë se shpreh keqardhje për mosrealizimin e takimit zyrtar me Presidentin e ri të Shqipërisë. Në reagimin në fjalë thuhet se LDK ka selinë e sajë, dhe mbetet e hapur për çdo zyrtar të shtetit shqiptarë.
“Për dallim nga krerët institucional paraprak të Shqipërisë, presidentët e shkuar, kryeministrin e tanishëm, e të tjerë kryeministra paraprak, Presidenti Begaj ka refuzuar të takojë LDK-në në selinë qendrore të saj. Ndonëse nuk e kuptojmë refuzimin e tillë, dhe shprehim njëkohësisht habinë për një qasje të pazakontë, konsiderojmë si mundësi të humbur takimin me Presidentin Begaj; të cilit i urojmë suksese në përfaqësimin më dinjitoz të Republikës së Shqipërisë. LDK ka selinë e vetë dhe ajo mbetet e hapur për çdo zyrtar të shtetit shqiptar- siç ka qenë përherë”, thonë nga LDK-ja.
