Në kuadër të vitit mbarëkombëtar të Skënderbeut, në datë 19 Nëntor, Ati i Shenjtë Papa Françesku ka pranuar të presë në Vatikan një audiencë të veçantë qytetare shqiptare. Pjesë e kësaj pritje janë përfaqësues të shtetit dhe shoqërisë, të besimeve fetare në Shqipëri, intelektualë e artistë.
Mësohet se të pranishëm do të jenë edhe kardinali i vetëm shqiptar Ernest Simoni, si dhe përfaqësuesit fetarë arbëreshë nga Kalabria dhe Siçilia. Ky takim në Selinë e Shenjtë mbledh të gjithë shqiptarët e bashkuar, ashtu siç është vetë figura e heroit tonë kombëtar Gjergj Kastrioti Skënderbeu. Simbol i unitetit dhe fuqisë së kombit, që në të gjitha kohërat i ka bashkuar shqiptarët pa dallim feje.
Po kështu, artistët shqiptarë të cilët janë pjesë e kësaj pritje, do të mbajnë një koncert madhështor të titulluar: “Të bashkuar në muzikë dhe në kujtim të Skënderbeut”. Në këtë koncert do të performojnë emra të njohur të skenës si Dua Lipa, Inva Mula, Olen Çezari, Genc Tukiçi, Elhaida Dani, Ermal Meta, Eno Peçi.
