Jemi në vit elektoral dhe tani në fushatën elektorale zyrtare. Të gjithë për këtë vit pritën bumin e investimeve publike. Pikërisht në këtë periudhe është koha e prerjes së shiritave dhe inaugurimeve, por dhe të investimeve që përfundojnë brenda një muaj.
Ky fit deri më tani ka qenë më i mbarë po ta krahasojmë me vitet e kaluara. Po ti referohemi të dhënave të Ministrisë së Financave, vërejmë se shpenzimet kapitale për 4 mujorin e vitit 2017, paraqesin një realizim në masën rreth 14.4 miliard lekë.
Krahasuar me të njëjtën periudhë të vitit 2016, ky zë është rreth 3.8 miliard lekë më shumë. Duke parë këto të dhëna dalin dy anë, ose ka një mirëmenaxhim të financave publike, ose të qënurit vit elektoral ka nxitur vënien në eficencë të investimeve.
Sipas të dhënave, shpenzimet e për investime me financim të brendshëm janë vë vlerën e 10.8 miliardë lekëve ndërsa ato me financim të huaj llogariten 3.6 miliardë lekë.
Por në të njëjtën periudhë të një viti më parë ky zë llogaritej në 6.2 miliardë lekë investimet me financim të brendshëm dhe 4.3 miliardë lekë më financim të huaj.
Referuar të njëjtave burimeve, shpenzimet e përgjithshme të buxhetit të shtetit për periudhën 4 mujore kapin një vlerë prej 128.2 miliardë lekëve, nga të cilat 114 miliardë lekë janë shpenzime korrente, ose siç njihen ndryshe shpenzime operative.
