Dy persona kanë vdekur në 24 orët e fundit në Greqi për shkak të virusit të Nilit Perëndimor.
Mësohet se viktimat janë një 76-vjeçar dhe një 90-vjeçare, të cilët shfaqën komplikacione të rënda shëndetësore pasi u infektuan nga virusi, në dy spitale të Athinës ku po kuroheshin prej disa ditësh.
Sipas Qendrës për Kontrollin dhe Parandalimin e Sëmundjeve Infektive, në gjithë vendin numri i personave të konfirmuar si të infektuar ka shkuar në 12.
Virusi i Nilit u shfaq për herë të parë në Greqi në vitin 2010 pas disa dekadash, në një formë epidemie që përfshiu më shumë se 260 persona. Nga këta të fundit, 190 u prekën nga meningjiti dhe encefaliti, ndërsa numri i viktimave arriti në 35 vetë, kryesisht të moshës mbi 60 vjeç.
Në dy vitet e fundit nuk pati asnjë rast zyrtar, ndërsa deri në 2014-ën u regjistruan herë pas here raste të veçuara të këtij virusi.
Prandaj, shfaqja e virusit të Nilit sivjet, për herë të parë pas tre vitesh ka alarmuar organet greke të shëndetit.
Virusi i Nilit Perëndimor përhapet nëpërmjet pickimit të mushkonjave të infektuara, ndaj specialistët udhëzojnë banorët të marrin masa vetjake.
