Mësymjet me forcë drejt Rakës që ndryshe quhet dhe si kryeqyteti “de-facto” i Shtetit Islamik, janë shtuar shumë. Forcat siriane me mbështetjen e Shteteve të Bashkuara po kryejnë luftime intensive për marrjen e qytetit simbol të rezistencës së ISIS-it. Luftimet intensive sinjalizuan fillimin e atij që koalicioni nën udhëheqjen e Shteteve të Bashkuara thotë se do të jetë fundi i kontrollit të ISIS-it në qytetin e rrethuar.
Komandantët e forcave demokratike siriane nën udhëheqjen e kurdëve thanë se beteja brenda qytetit – e para në përpjekjen disa mujore, tregon se lufta mund të jetë e gjatë dhe e kushtueshme.
Shteti Islamik e mori kontrollin e Rakës në janar të 2014-ës dhe që nga ajo kohë është bërë baza e udhëheqësve të grupit. Forcat Demokratike të Sirisë kanë avancuar për muaj me radhë, në mënyrë të qëndrueshme drejt jugut, për në Raka, duke e spastruar zonën nga elementë të ISIS-it, me ndihmën e bombardimeve amerikane.
Fati i Rakës pas ISIS-it është bërë objekt spekulimesh intensive dhe tensionesh mes palëve të ndryshme që luftojnë në Siri.
Turqia e kundërshton rolin e Forcave Demokratike Siriane dhe kontingjentin e madh të luftëtarëve kurdë, të cilët zyrtarët turq i konsiderojnë si terroristë.
Nuk dihet shifra e viktimave, por komandantët turq thonë se kanë dëgjuar që IS po i mban mijëra civilë si mburoja njerëzore. Sipas njoftimeve, ISIS ka prerë energjinë elektrike dhe ka mbyllur kafenetë e internetit në Raka. Sipas vlerësimeve të pakonfirmuara, numri aktual i popullsisë së qytetit është rreth 200 mijë vetë.
Koalicioni nën udhëheqjen e Shteteve të Bashkuara tha se me rimarrjen e kontrollit të Rakës, qyteti do t’u kthehet civilëve lokalë që nuk mbahen nga grupi terrorist.
